Nyuma yaho abategetsi barindwi biganjemo abasirikare bakomeye bapfiriye umunsi umwe muri Sudani y’Epfo, bigahwihwiswa ko bazize Covi-19 , biravugwa ko abaminisitiri 10 muri guverinoma ubu banduye iki cyorezo. Visi Perezida w’iki gihugu Riek Machar, na we aherutse gutangaza ko bamusanzemo iyi ndwara, we n’umugore we Angelina Teny usanzwe ari Minisitiri w’Ingabo.
Nk’uko byemejwe muri iki gitondo na Minisitiri w’Itangazamakuru, Michael Makuei, wabwiye BBC ko abagize itsinda ryihariye rya guverinoma rishinzwe kurwanya iki cyorezo bose uretse minisitiri w’ubuzima abandi bamaze kwandura Covid-19.
Mu ntangiriro z’iki cyumweru, ikinyamakuru South Sudan News Now cyanditse ko abantu barindwi bapfuye hagati ya saa kumi z’igicamunsi cy’itariki ya 13 Gicurasi na saa yine z’igitondo cy’itariki ya 14, bose biganjemo abasirikare bakuru bapfuye bikekwa ko bazize icyorezo cya Coronavirus.
Makuei yahakanye amakuru yavuzwe ko Perezida Salva Kiir uri mu bagize iri tsinda ko na we bamusanzemo iki cyorezo. Ku wa gatatu, abaminisitiri bamaze gusangamo Covid-19 bose kimwe n’abandi bakozi hamwe n’abarinda aba bategetsi bari mu kato, leta ivuga ko bose bameze neza.
Imibare y’abanduye coronavirus muri Sudani y’Epfo yazamutse cyane mu minsi mike ishize ukurikije uko bimeze mu bindi b’ibihugu biherereye mu karere ka Afurika y’Iburasirazuba, ubu hamaze kuboneka abanduye bagera kuri 481.
