Kuri uyu wa 4 Kanama, abapolisi b’u Rwanda 140 basoje ubutumwa bw’amahoro muri Haà¯ti basesekaye ku kibuga cy’indege mpuzamahanga cya Kigali.
Baje bayobowe n’umuyobozi wungirije w’iri tsinda rya 9, SSP Eduard Kiza. Bakiriwe n’umuvugizi wa polisi mu Rwanda, CP John Bosco Kabera.
CP Kabera yabashimiye ubwitange, umurava, ubunyamwuga ndetse n’umuco wo gufasha abaturage byabaranze muri iki gihe kingana n’umwaka bamaze mu butumwa. Batoze abaturage ba Haà¯ti igikorwa cy’umuganda, isuku n’isukura ndetse n’umuco wo kwigira nk’uko byatangarijwe ku rubuga rwa Twitter rwa polisi y’u Rwanda.
U Rwanda rwatangiye kohereza abapolisi muri iki gihugu mu 2011. Umubare w’abamaze kujya muri ubu butumwa bw’Umuryango w’Abibumbye bagera ku 1360. Bose bagira inshingano zo kubaka ubushobozi mu baturage barindira muri iki gihugu.
Iri tsinda nta rindi ryarisimbuye bitewe n’uko amasezerano polisi y’u Rwanda yagiranye n’Umuryango w’abibumbye yarangiye.
