Nyuma y’umunsi umwe doze za mbere z’inkingo za Covid-19 zigejejwe mu Rwanda, kuri uyu wa Gatanu mu bitaro hirya no hino mu gihugu hatangiye ibikorwa byo gukingira ku mugaragaro.
Minisiteri y’ubuzima yatangaje ko igikorwa cyo gukingira Covid-19 mu Rwanda cyatangiye mu turere twose. Ibitaro by’utururere ndetse n’ibigo nderabuzima birimo gukingira ibyiciro by’abarusha abandi ibyago byo kwandura cyangwa kuzahazwa na COVID19.
Ni nyuma yo kwakira doze zigera mu 347,000 za Oxford-AstraZeneca na Pfizer zo muri zahawe u Rwanda muri gahunda ya Covax, zatangiye kugezwa mu bitaro bitandukanye mu gihugu kuri uyu wa Kane ushize zitwawe na za kajugujugu za gisirikare n’imodoka z’ibitaro.
Minisiteri y’ubuzima kandi yatangaje ko izi nkingo zajyanywe ku bitaro 50 n’ibigo nderabuzima 508 hirya no hino mu gihugu, kandi “ziterwa abazigenewe mu gihe cy’amasaha 48 uhereye kuwa Gatanu.”
Ku bitaro bya Kabgayi umwe mu baganga bavuganye na BBC utifuje ko amazina ye atangazwa amaze gukingirwa yagize ati: “Ndishimye ko banteye urukingo, ariko ni doze ya mbere kandi hakenerwa ebyiri, n’ubundi ndakomeza kwirinda uko bisanzwe”.
Mugenzi we ukora mu Bitaro bya Ruhengeri ati: “Bararunteye numva rwose biranshimishije, gusa twese turacyibaza ngo ‘mu gihe haba ingaruka mbi ziruvuyeho ni inde uzabibazwa?'”.
Minisitiri w’ububanyi n’amahanga Vincent Biruta yatangaje ko kuri uyu wa Gatanu yakiriye izindi doze 50,000 z’impano y’inkingo leta y’u Buhinde yahaye iy’u Rwanda.
Kurikira ibiganiro n’amavidewo binyura kuri Bwiza TV
