Abarwanashyaka b’Ishyaka rya Ingabire Umuhoza Victoire, FDU- Inkingi baba mu mahanga bavuga ko batazi niba koko umuyobozi wabo yaba yarasabye imbabazi Perezida Paul Kagame kugira ngo abe yarafungurwe kuwa 15 Nzeri 2018 nk’uko byavuzwe mu itangazo ry’inama y’abaminisitiri ryo kuwa 14 Nzeri 2018.
Umunyamabanga mukuru w’iri shyaka, Dr. Emmanuel Mwiseneza mu kiganiro na Radiyo Ijwi ry’Amerika kuwa 15 Nzeri yavuze ko we na bagenzi we b’abayobozi muri FDU-Inkingi batazi ko Ingabire yaba yaranditse asaba imbabazi mu kwezi kwa Kamena 2018.
Ati” Kuba afunguwe ni ibintu twakwishimira, nk’umunyamabanga wa FDU sinigeze menya izo mbabazi n’abandi bayobozi twaganiriye kuri icyo kibazo ntibakizi, izo mbabazi twebwe ntazo tuzi”
Uyu muyobozi avuga ko bishoboka ko haba harimo kwitiranya ibaruwa Umunyamategeko wa Ingabire Victoire, Me Caroline yanditse asaba ko Ingabire yafungurwa.
Ati” Turibaza niba uku kwaka imbabazi kutaba kwitiranwa n’ibaruwa uwamuburaniraga, Me Caroline mu rukiko rwa Arusha rw’uburenganzira rwa muntu yanditse asaba ko yarekurwa. Dukekako ari byo baba baragendeyeho. Niba hari urundi rwandiko nyir’ubwite yiyandikiye twe ntabyo tuzi gusa niba ruhari nabyo tuzabimenya gusa twe twumva ntarwo kuko nta cyaha yakoze”
Dr. Mwiseneza avuga ko Ingabire yaba yararekuwe bitewe n’uko igihano cy’imyaka umunani yari yarakatiwe bwa mbere n’urukiko rukuru mu wa 2013 cyari kirangiye.
Abanyamuryango ba FDU-Inkingi batangaje ibi nyuma yaho itangazo ryagiye ahabona ku wa Gatanu tariki ya 14 Nzeri 2018, riturutse muri Minisiteri y’ubutabera, ryavugaga ko icyemezo cyo gufungura Ingabire Victoire Umuhoza cyafatiwe mu nama y’Abaminisitiri yari iyobowe na Perezida Kagame.
Ingabire asanzwe ayobora ishyaka ritavuga rumwe n’ubutegetsi ritemewe FDU- Inkingi, yari yarakatiwe igifungo cy’imyaka 15 mu mwaka wa 2013 nyuma yo kujurira.
Itangazo rya Minisiteri y’ubutabera ryavugagako abarekuwe bakuriweho igihe cy’igihano bari basigaranye, hashingiwe ku bubasha bwa Perezida wa Repubulika bwo gutanga imbabazi, nyuma y’ubusabe bwabo buheruka bwo mu kwezi kwa Gatandatu uyu mwaka.
