Abasirikare ba Uganda barinda Perezida wa Guinée Equatorial, abandi bayobozi bakuru n’ibikorwa by’iterambere bavuga ko bashobora gukora igisa n’imyigaragambyo bitewe n’umuyobozi wabo, Col. James Kato Kyebara.
Aba basirikare barashinja Col. Kato kubafata nabi, kubakorera ivangura, gukura mu nshingano buri wese utemeranya nawe ndetse no kumusubiza muri Uganda. Ibi byose bavuga ko bikorerwa abasirikare bato, abofisiye bato n’abakuru.
Mu bagizweho ingaruka n’ibyemezo bya Col. Kato bavugwa harimo: Pte Geoffrey Liaka na L/Cpl Jubille Amanya basubijwe muri Uganda tariki ya 22 Gicurasi 2021.
Aba basirikare hamwe n’abandi barimo: Cpl Majiu Aoki, Cpl Opio na Pte Enock Arinaitwe, bafashwe batorotse ibirindiro, bagiye kunywa inzoga tariki ya 5 Gicurasi 2021. Aba batatu bo bahawe imbabazi, baguma muri Guinée Equatorial.
Undi ni Maj. Geoffrey Munongo wirukanwe na Col. Kato, akoherezwa muri Uganda mu ntangiriro za Kanama 2021.
Mu kiganiro bamwe muri aba basirikare bagiranye na Observer, bavuze ko iki kibazo bamaze igihe bakimenyesheje ubuyobozi bukuru bw’igisirikare muri Uganda, ndetse ngo cyigeze kwigwaho mu biro bya Minisiteri y’Ingabo ya Guinée Equatorial ariko umuti wacyo ntiwigeze uboneka.
Umwe muri bo yagize ati: “Ibintu ntibyigeze biba neza kuva twaza. Twibajije impamvu abakomanda ba UPDF bose bemeye kuduhanisha uyu nguyu.”
Aba basirikare bavuga ko mu gihe ikibazo cyabo cyaba kidakemutse, bazigaragambiriza Col. Kato, bagatera umugongo ubuyobozi bwe.
Uganda ifite abasirikare 250 muri Guinée Equatorial. Bagenda basimburana nyuma y’umwaka. Abariyo bagiyeyo muri Gashyantare 2021, bazavayo mu 2022.
