Ku wa Gatanu tariki ya 6 Nzeri 2019, abasirikare kabuhariwe ba Uganda barwanira mu mazi bari bataye muri yombi Abanye Congo b’abarobyi 18, kuri ubu bakaba bongeye gufata abandi 30.
Ni abarobyi 21 bo mu gace ka Kyavinyonge n’abandi icyenda bo muri Nyakakoma, mu Ntara ya Kivu y’Amajyaruguru, bakaba baratawe muri yombi ku wa 10 Nzeri 2019.
Aba barobyi barobaga mu kiyaga cya Edouard, bafatwa bashinjwa kurengera baroba mu mazi ya Uganda, ariko ibi ntabwo babihuzaho n’abahaye amakuru radio Okapi bavuga ko bari ku butaka bwa Congo.
Nyuma yo gutabwa muri yombi, ubu ngo bafungiye ahitwa Rwashama muri Uganda. Sosiyeti Sivike y’i Nyakakoma muri Congo ikaba ifite amakenga kuri aya makuru.
Perezida wa Sosiyeti sivile, Samuel Muluko, avuga ko itabwa muri yombi ry’aba baturage rikorwa mu buryo budasobanutse, ko aba basirikare ba Uganda babafata kugira ngo babambure amafaranga.
Yagize ati “Iryo fatwa, abagande bakora ubucuruzi butemewe, kugira ngo barekure abo banye congo b’abarobyi, babaca Magana atatu y’amadolari, bivuze ko iyo bafashe 10 ni ibihumbi bitatu by’amadolari.”
Iyi radio itangaza ko abarobyi 102 b’abanye Congo baciriwe imanza muri Uganda, ngo abandi basaga 100 bakaba barafashwe kuva umwaka wa 2019 watangira ariko dosiye zabo zikaba zitarahabwa urukiko rwa Katwe muri Uganda.
