Raporo y’Umuryango w’Abibumbye ivuga ko abarenga 100 bahoze muri guverinoma ya Afghanistan, barimo abashinzwe umutekano ndetse n’abakoranye n’ingabo mpuzamahanga bishwe kuva Abatalibani bigarurira igihugu muri Kanama umwaka ushize.
Umunyamabanga mukuru w’Umuryango w’Abibumbye, Antonio Guterres, yatangaje ko muri raporo yo kuri iki Cyumweru yagejejwe ku nama k’Umuryango w’Abibumbye ishinzwe umutekano “abarenga bibiri bya gatatu” by’abiciwe bivugwa ko bishwe mu buryo butemewe n’abatalibani cyangwa ibishamikiyeho.
“N’ubwo hatangajwe imbabazi rusange ku bahoze bagize Guverinoma, abashinzwe umutekano ndetse n’abakoranye n’ingabo mpuzamahanga, [Ubufasha bw’Umuryango w’Abibumbye muri Afuganisitani] UNAMA, bwakomeje kwakira ibirego byizewe by’ubwicanyi, kunyerezwa n’ibindi binyuranyije n’amategeko”ku bahoze muri guverinoma n’abakoranye n’ingabo mpuzamahanga, nk’uko raporo ivuga.
Umuryango w’Abibumbye wasuzumye dosiye 44 zo guta muri yombi by’agateganyo, gukubitwa no guterwa ubwoba, 42 muri zo byakozwe n’Abatalibani nk’uko iyi nkuru dukesha Al Jazeera ivuga.
Raporo yakiriye kandi “ibirego byizewe by’ubwicanyi ndengakamere byibuze bwakorewe abantu 50 bakekwaho kuba bafitanye isano n’ishami rya Islamic State muri Afghanistan (ISIL-KP).
Impirimbanyi z’imiryango iteganmiye kuri leta zigera ku munani nazo zarishwe, harimo batatu bishwe n’Abatalibani na batatu bishwe na ISIL-KP, naho 10 batabwa muri yombi by’agateganyo, barakubitwa kandi baterwa ubwoba n’Abatalibani.
Abanyamakuru babiri na bo barishwe, umwe yishwe ISIL-KP, mu gihe abandi babiri bakomerekejwe n’ abitwaje intwaro batazwi.
