Bamwe mu baturage bari basanzwe bafite cyangwa bashaka kubaka ibibanza byabo biri muri Zone Kanyosha ahitwa Nkenga-Busoro, ahari inyubako ya Minisitiri w’Intebe, Alain-Guillaume Bunyoni, babwiwe ko bagomba kutongera kuhubaka ndetse ko bazajya basiga metero 200 uvuye aho yubatse. UBM News ivuga ko aba baturage bari mu kwijujuta n’agahinda kenshi, bavuga ko “Kuva Bunyoni yatangira kuhubaka, amazu yabo yatangiye gusenywa, abandi bangirwa kuba bakongera kuhubaka.” Bavuga ko ubu byabaye itegeko ” Gukuraho amazu bahubatse nta ngurane y’imitungo yabo bwite biguriye.” Ku bari basanzwe bahatuye, begereye iyo nyubako ya Bunyoni, bavuga ko ” Twasabwe gusiga metero 200 uvuye kuri iyo nzu ya Bunyoni.” Aba baturage bavuga ko babajije impamvu inzo zabo ziri gusenywa, ubuyobozi mu nzego z’ibanze ” Butubwira ko nyakubahwa (Alain Guillaume Bunyoni) ni we wasabye ko izo nzu zacu zihava bityo azajye abasha kwisanzura.” Aba baturage ubu baribaza uko bizagendekera imiryango yabo isigaye idafite aho kurambika umusaya. Abandi nabo bibaza uko bizagenda ku kuba izo metero 200 zigomba gusigwa kandi iyo nzu yubatswe basanzwe batuye aho hantu, ikaza ihabasanga. Mu gukoma urusyo n’ingasire ariko, Minisitiri w’Intebe, Bunyoni, umwe mu bakomeye mu ishyaka riri ku butegetsi mu Burundi, ntacyo aravuga kuri ibi bimuvugwaho. Alain-Guillaume Bunyoni ni umugabo uzwi cyane mu Burundi kandi utinywa kubera imbaraga afite mu butegetsi bwa CNDD-FDD kuva mu 2005. Uyu mugabo ari mu myanya y’ubutegetsi kuva mu 2005 ubwo yari afite imyaka 33. Hari igihe byavugwaga ko ari we nimero ya kabiri mu kugira ijambo ku biba mu gihugu nyuma ya Pierre Nkurunziza. Mu 2015 ubwo yari akuriye ibiro bya perezida, yari afite ijambo rinini mu kurwanya abigaragambya bamagana manda bita iya gatatu ya Perezida Nkurunziza Pierre. Nyuma yahise agirwa Minisitiri w’umutekano muri uwo mwaka.
