Abanyeshuri n’abarimu bo mu Ishuri Rikuru ry’u Rwanda rya Gisirikare (NDC-R), uyu munsi basuye Minisiteri y’Ububanyi n’Amahanga n’Ubutwererane (MINAFFET), mu rwego rwo kurushaho gusobanukirwa politiki y’u Rwanda mu by’ububanyi n’amahanga, ibikorwa bijyanye na dipolomasi, imibanire mpuzamahanga n’ubutwererane.
Iri tsinda ryakiriwe kandi rihabwa ikiganiro kirambuye na Abel Buhungu, uhagarariye u Rwanda muri Repubulika ya Sudani, mu izina rya Minisiteri. Icyo kiganiro cyibanze kuri politiki y’u Rwanda mu by’ububanyi n’amahanga, ibyihutirwa muri dipolomasi n’uruhare rwa dipolomasi mu guteza imbere umutekano w’igihugu, gushimangira umubano w’u Rwanda n’ibindi bihugu by’amahanga no guteza imbere inyungu z’u Rwanda.
Umuyobozi w’Ishuri Rikuru ry’u Rwanda rya Gisirikare, Brig Gen (Rtd) Didace Ndahiro, yashimangiye ko uru ruzinduko rugamije kunganira amasomo abanyeshuri bahabwa ku bijyanye n’imibanire mpuzamahanga na politiki y’ububanyi n’amahanga. Yagaragaje ko uru ruzinduko ruha abanyeshuri amahirwe yo gusobanukirwa kurushaho uko politiki y’ububanyi n’amahanga ishyirwa mu bikorwa, imbogamizi zigaragara n’uruhare rwa dipolomasi mu kubungabunga umutekano w’igihugu n'uw'Isi muri rusange.
Iri tsinda kandi ryasuye Ambasade ya Repubulika ya Nigeria na Ambasade ya Misiri mu Rwanda, aho abanyeshuri n’abarimu bongeye kunguka ubumenyi ku mikoranire mu bya dipolomasi n’ubufatanye mpuzamahanga.