Ambasaderi w'u Rwanda mu Muryango w'Abibumbye, Martin Ngoga, yatangaje ko u Rwanda rwafashe ingamba zo gukuraho ingamba z'ubwirinzi zarwo, nubwo yemeza ko umutwe wa FDLR ushyigikiwe na Guverinoma ya Repubulika ya Demokarasi ya Congo uhiteje akaga ku mutekano warwo n'akarere muri rusange.
Ibi Amb. Ngoga yabitangarije mu nama y'Akanama k'Umutekano k'Umuryango w'Abibumbye yabaye kuri uyu wa Kabiri, itariki ya 29 Nzeri, ku bijyanye n'ibibazo byo mu burasirazuba bwa Repubulika ya Demokarasi ya Congo, aho yongeye kwemeza ko igihugu cye cyiyemeje gushyigikira inzira za dipolomasi zikomeje, ashimangira ko hakenewe ishyirwa mu bikorwa ry'amasezerano yashyizweho umukono hagati ya Kigali na Kinshasa.
Mu ijambo rye, uyu mudipolomate w'u Rwanda yavuze ko ikibazo cy'umutekano mu burasirazuba bwa Congo kimaze imyaka hafi mirongo itatu kiri ku murongo w'ibyigwa mu nama z'Akanama k'Umutekano ka Loni. Yagaragaje ko kuva mu 1999, Umuryango w'Abibumbye wakoresheje miliyari zirenga 30 z'amadolari binyuze mu butumwa bwa MONUC ndetse na MONUSCO, ariko bitakemuye burundu impamvu z'amakimbirane.
Uhagarariye u Rwanda yishimiye imbaraga za dipolomasi zashyizwe mu biganiro bya Washington na Doha, ndetse n'imihate ya Leta Zunze Ubumwe za Amerika, Qatar, Umuryango wa Afurika Yunze Ubumwe, n'abunzi batandukanye bakora ibishoboka mu gushaka igisubizo kirambye cy'ikibazo.
Yemeje ko u Rwanda rukomeje gushyigikira amasezerano yabereye i Washington no kuyashyira mu bikorwa mu buryo bwiza. Yavuze ko u Rwanda rukomeje kugira uruhare mu buryo buhuriweho bwo kugenzura no guhuza ibikorwa by'umutekano, cyane cyane ibijyanye no guhagarika FDLR no gukuraho ingamba z'ubwirinzi.
Yagize ati: "U Rwanda rwafashe ingamba zo gukuraho ingamba z'ubwirinzi kandi rubimenyesha binyuze mu buryo buteganywa na Washington."
Yanagaragaje ko u Rwanda rwari rwatanze igitekerezo cyo gushyiraho uburyo bwo kugenzura bw'impande eshatu burimo u Rwanda, RDC na Leta Zunze Ubumwe za Amerika nk'umuhuza.
Ku Rwanda, ibijyanye byose no gushyira mu bikorwa amasezerano bigomba kwemezwa n'ubugenzuzi bwigenga, kandi impande zombi zigomba gusuzumwa hakurikijwe ibipimo bingana. Uhagarariye u Rwanda yavuze ko hari itandukaniro rinini mu ishyirwa mu bikorwa ry'amasezerano y'amahoro yashyizweho umukono.
FDLR: Ikibazo cy’ingenzi cyane
Ambasaderi Ngoga kandi yikije cyane ku kibazo kijyanye n’umutwe wa FDLR (Democratic Forces for the Liberation of Rwanda), afata nk’ingingo y’ingenzi mu masezerano y’umutekano. Mu bitekerezo bye, guca intege cyangwa gukuraho ubushobozi bw’uyu mutwe witwaje intwaro no guhagarika ubufatanye bwose na wo, ni inshingano z’ingenzi zikubiye mu nzira y’ibiganiro bya Washington.
Uhagarariye u Rwanda yagaragaje ko raporo iheruka y’Umunyamabanga Mukuru w’Umuryango w’Abibumbye yemeza ko FDLR igikorera mu duce dutandukanye two mu burasirazuba bwa Repubulika ya Demokarasi ya Congo (DRC), cyane cyane muri Rutshuru, Masisi, Nyiragongo na Walikale.
Nubwo yemera ko gahunda z’ibiganiro bya Washington na Doha zitanga amahirwe yo guhindura burundu imiterere y’amakimbirane, yagaragaje ko gushyira umukono ku masezerano gusa bidahagije ngo amahoro aboneke.
“Icy’ingenzi ni ugushyira mu bikorwa amasezerano,” aha yashimangiraga akamaro ko gushyira amasezerano mu bikorwa bifatika, gukomeza ibiganiro hagati y’u Rwanda na Repubulika ya Demokarasi ya Congo, no kugenzura ishyirwa mu bikorwa ryayo mu buryo butabogamye.
Uhagarariye u Rwanda yongeye kwemeza ko igihugu cye cyubahiriza ibyo kiyemeje kandi ko cyiteguye gufata ingamba zose zikenewe kugira ngo cyorohereze igenzura ryabyo. Yasabye izindi mpande gukora nk’uko, yemeza ko amahoro arambye mu karere ashobora kugerwaho gusa binyuze mu gushyira mu bikorwa amasezerano neza, gukorera mu mucyo mu ishyirwa mu bikorwa ryayo, gukomeza ibiganiro, no gukemura ibibazo by’umutekano by’abaturage bose barebwa n’ikibazo.