Ikipe y’Igihugu ya Caméroun, Les Lions Indomptables, yabaye iya mbere ikatishije itike y’Igikombe cya Afurika cya 2022, nyuma yo kunyagira Walias ya Ethiopie ibitego 4-1.
Hari mu mukino wa kabiri wo mu tsinda rya mbere waraye ubereye kuri Stade ya Omnisport Paul Biya i Yaoundé.
Ibitego bibiri bya Karl Toko Ekambi na bibiri bya Kapiteni Vincent Aboubakar wahise wuzuza ibitego bine mu gikombe cya Afurika cya 2021, byari bihagije ngo Caméroun yegukane amanota atatu y’uriya mukino.
Ethiopie ni yo yari yabanje gufungura amazamu biciye kuri Dawa Hotessa Dukele wayifunguriye amazamu ku munota wa kane w’umukino.
Caméroun yakiriye ririya rushanwa yahise iba ikipe ya mbere igeze muri 1/8 cy’irangiza, nyuma yo gutsinda imikino ibiri yo mu tsinda yose imaze gukina. Ibi birayihesha kuriyobora n’amanota atandatu kuri atandatu n’ibitego bine izigamye.
Iyi Caméroun ikurikiwe na Burkina Faso cyo kimwe na Cap-Vert, mu gihe Ethiopie iza ku mwanya wa nyuma mu tsinda A n’ubusa bw’amanota.
Caméroun ishobora kwiyongeraho imwe mu ishobora gutsinda indi hagati ya Les Lions de la Teranga ya Sénégal na Syli National ya Guinée-Conakry zifitanye umukino wo mu tsinda rya kabiri ku gicamunsi cyo kuri uyu wa Gatanu.
