Umwaka w’2020 waranzwe cyane n’inkuru mbi zirangajwe imbere n’icyorezo cya Covid-19 cyahitanye ubuzima bwa miliyoni z’abantu ku Isi. Usibye n’agahinda katewe n’iki cyorezo, hari abahamya ko ubuzima bw’ibyamamare n’abakomeye muri politiki bwatakariye muri uyu mwaka, ari bwinshi ugererenyije no mu myaka myinshi ishize.
Izi nkuru zageze no ku mugabane wa Afurika, aho muri uyu mwaka (2020) wonyine, abantu 12 babaye ba Perezida b’ibihugu bitandukanye batakaje ubuzima.
Ni abahe?
Tariki ya 4 Gashyantare 2020, Daniel Arap Moi wabaye Perezida wa Kenya kuva mu 1978 kugeza mu 2002, yapfuye afite imyaka 95 y’amavuko. Ibiro by’Umukuru w’Igihugu cya Kenya, byatangaje ko Moi yari amaze igihe kirekire arwaye.
Daniel Arap Moi yayoboye Kenya imyaka 24
Muri uko kwezi tariki ya 25 Gashyantare 2020, Muhammad Hosni El Sayed Mubarak wayoboye Misiri kuva mu 1981 kugeza mu 2011, yapfuye ari mu kubagirwa mu bitaro bya gisirikare, Televiziyo y’Igihugu itangaza ko ubuzima bwe butari bumeze neza. Yari afite imyaka 91 y’amavuko.
Tariki ya 30 Werurwe 2020, Jacques Joachim Yhombi-Opango wayoboye Repubulika ya Congo kuva mu 1977 kugeza mu 1979, na we yapfuye afite imyaka 81 y’amavuko.
Tariki ya 8 Kamena 2020, Pierre Nkurunziza wabaye Perezida w’u Burundi kuva mu 2005, yapfuye azize indwara y’umutima, ari hafi kuzuza imyaka 15 ari ku butegetsi. Yari afite imyaka 55 y’amavuko.
Pierre Nkurunziza ni we Mukuru w’Igihugu wapfuye akiri muto muri uyu mwaka
Tariki ya 24 Nyakanga 2020, Banjamin Mkapa wabaye Perezida wa Tanzania kuva mu 1995 kugeza mu 2005, yapfuye azize uburwanyi nk’uko Perezida John Magufuli yabitangarije ku rubuga rwa Twitter. Mkapa yari afite imyaka 81 y’amavuko.
Mkapa ni umusaza wari wubashywe cyane muri Afurika y’Iburasirazuba
Tariki ya 24 Kanama 2020, Pascal Lisouba wabaye Perezida wa Repubulika ya Congo kuva mu 1992 kugeza mu 1997, yapfuye afite imyaka 88 y’amavuko.
Tariki ya 15 Nzeri 2020, Mousa Traoré wabaye Perezida wa Mali kuva mu 1968 kugeza mu 1991, yapfuye afite imyaka 63 y’amavuko.
Tariki ya 10 Ugushyingo 2020, Amadou Toumani Touré na we wabaye Perezida wa Mali kuva mu 2002 kugeza mu 2012, yapfuye afite imyaka 72 y’amavuko.
Jerry John Rawlings wabaye Perezida wa Ghana kuva tariki ya 4 Kamena 1979 kugeza tariki ya 24 Nzeri 1979, kuva mu 1981 kugeza mu 2001; yapfuye tariki tariki ya 12 Ugushyingo 2020, afite imyaka 73 y’amavuko.
Rawlings afatwa nk’uwaharaniye ukwibohora kwa Ghana
Sidi Mohamed Ould Cheikh Abdallahi wabaye Perezida wa Repubulika ya Mauritania kuva tariki ya 19 Mata 2007 kugeza tariki ya 6 Kanama 2008, yapfuye tariki ya 23 Ugushyingo 2020, afite imyaka 82 y’amavuko.
Mamadou Tandja wayoboye Niger kuva mu 1999 kugeza mu 2010, yapfuye tariki ya 24 Ugushyingo 2020, na we afite imyaka 82 y’amavuko.
Pierre Buyoya wabaye Perezida w’u Burundi kuva mu 1987 kugeza mu 1993, no kuva mu 1996 kugeza mu 2003, yapfuye hagati yo kuri uyu wa 17 na 18 Ukuboza 2020, afite imyaka 71 y’amavuko. Bivugwa ko yazize icyorezo cya Covid-19.
Ni benshi ku bapfuye mu 2019
Umwaka w’2020 wapfuyemo ababaye ba Perezida b’Ibihugu benshi ugereranyije n’uw’2019.
Nka tariki ya 25 Nyakanga 2019, hapfuye Mohamed Beji Caid Essebsi wabaye Perezida wa Tunisia kuva mu 2014 kugeza ku munsi w’urupfu rwe. Icyo gihe yari agejeje ku myaka 82 y’amavuko.
Mohamed Morsi wabaye Perezida wa Misiri kuva mu 2012 kugeza mu 2013 na we yari yarapfuye tariki ya 17 Kamena 2019, afite imyaka 68 y’amavuko.
Robert Mugabe wayoboye Zimbabwe kuva mu 1987 kugeza mu 2017, na we yafpuye tariki ya 6 Nzeri 2019, afite imyaka 95 y’amavuko.
Zine Al-Abideen Ben Ali wabaye Perezida wa Misiri, Dawda Jawara wabaye Perezida wa Gambia na France-Albert René wabaye Perezida wa Seychelles; nabo bapfuye mu 2019.
