Perezida w’inzibacyuho wa Guinée-Conakry, Col Mamady Doumbouya, yagaragaje akanyamuneza ubwo yari akurikiranye umukino Ikipe y’Igihugu cye (Syli National) yatsinzemo Malawi.
Ejo ku wa Mbere tariki ya 10 Mutarama ni bwo Syli National yegukanye amanota atatu ya mbere mu gikombe cya Afurika cy’ibihugu kiri kubera muri Caméroun, nyuma yo gutsinda Malawi igitego 1-0.
Igitego cyo ku munota wa 35 w’umukino cya myugariro w’ibumoso, Issiaga Sylla, ni cyo cyafashije Guinée-Conakry y’umutoza Kaba Diawara kwegukana amanota atatu ya mbere ya mu gikombe cya Afurika cya 2021.
Amafoto yashyizwe ku rubuga rwa Twitter rwa Perezidansi ya Guinée, yerekana Col Mamady Doumbouya ari gukurikirana uriya mupira ari kumwe n’abantu ba hafi ye yizihiwe.
Perezidansi y’iki gihugu yavuze ko Perezida Doumbouya wari wambaye umwambaro wa Syli National yashimiye abakinnyi bayo uko bitwaye imbere ya Malawi, asaba abaturage be gushyigikira iriya kipe afata nka ba Ambasaderi babo.
Mbere y’uko Guinée-Conakry ihaguruka iwabo ije i Kigali hano mu Rwanda aho yavuye yerekeza muri Caméroun, Col Mamady Doumbouya yahaye abakinnyi bayo kurwanirira ishema ry’igihugu batwara Igikombe cya Afurika, bitihi se bagasubiza amafaranga batakajweho.
Syli National kuri ubu iri ku mwanya wa mbere mu tsinda rya kabiri irimo inganya na Les Lions de la Teranga ya Sénégal iyikurikiye.
Aya makipe yombi azisobanura mu mukino wa kabiri wo mu tsinda uteganyijwe ku wa Gatanu tariki ya 14 Mutarama yuhera saa cyenda z’i Kigali.
