Kuri uyu wa Mbere, itariki 28 Kamena, Akarere ka Nyaruguru kashyikirijwe inkingo zisaga igihumbi zigiye guhabwa abageze mu zabukuru nka doze ya kabiri nyuma y’inkingo za mbere zagejejwe muri aka karere ku itariki 7 Kamena.
Indege ya Kajugujugu y’igisirikare cy’u Rwanda kirwanira mu kirere, RAF-2812 niyo yagejeje iki cyiciro cya kabiri, kigizwe n’inkingo 1411 za Covid-19 zo mu bwoko bwa Pfizer, mu Karere ka Nyaruguru, aho zigiye gufasha abageze mu zabukuru kubona doze ya 2.
Ubuyobozi bw’Akarere ka Nyaruguru bubinyujije kuri twitter bwavuze ko izi nkingo zahise ziyanwa ku Bitaro bya Munini, aho ibigo nderabuzima bitandukanye bijya kuzifata bikazigeza ku baturage zigenewe.
Ku itariki ya 07 Kamena nibwo izindi nkingo zigera ku 1411 na none zagejejwe mu Karere ka Nyaruguru zijyanwe na none na kajugujugu y’igisirikare cy’u Rwanda, RAF-0609.
Hagati aho abaturage barasabwa gukomeza kubahiriza ingamba zo kwirinda icyorezo cya Covid-19.
Kurikira ibiganiro n’amavidewo binyura kuri Bwiza TV
