Mu Ntara y’Iburengerazuba, Akarere ka Rubavu niko kaje imbere mu mezi abiri ashize mu kugaragaramo ibyaha byinshi, aho gakurikirwa n’Akarere ka Rusizi ndetse n’aka Rutsiro nk’uko byatangajwe na Polisi y’Igihugu muri iyi ntara.
Ibi byatangarijwe mu nama y’umutekano yaguye y’Intara y’Iburengerazuba iherutse guteranira muri Hotel Bethanie, mu ntangiriro z’iki cyumweru, itariki 02 Kanama 2016, yari iyobowe na Guverineri w’Intara Madamu Mukandasira Caritas. Iyi nama ikaba yarasuzumiwemo uko umutekano wifashe mu Ntara.
Nk’uko byasobanuwe n’Umuyobozi wa Polisi mu Ntara y’Iburengerazuba, ACP Mutezintare Bertin, mu mezi abiri ashize (Gicurasi — Nyakanga 2016) umutekano wari wifashe neza muri rusange uretse ibikorwa bimwe na bimwe byagiye bigaragara.
Muri ibyo bikorwa harimo gukubita no gukomeretsa, gucuruza ibiyobyabwenge,ubujura buciye icyuho no gusambanya abana.
Mu Turere tuza ku isonga mu gukora ibyaha byinshi harimo Rubavu yihariye ibyaha 158, Rusizi ifite 115 naho Rutsiro akaba ariyo yagaragayemo ibyaha bike bigera kuri 58.
Mu bindi bihungabanya umutekano w’abaturage harimo impanuka. Muri aya mezi ashize hakaba harabaye impanuka 127, zikomerekeramo abantu 127 naho 25 bahasiga ubuzima. Abayobozi bakaba barasabwe gukomeza gukangurira abaturage kwirinda ibyaha ndetse hasabwa ubufatanye n’inzego zose mu gushashya ibyo byaha.
Abari mu nama kandi bunguranye ibitekerezo ku isuku mu ntara bagaragaza ko igomba kuba umuco kuri buri muturage, aho abantu bose basabwe kugira isuku aho batuye, ku mubiri wabo n’aho bakorera mu rwego rwo kwirinda ingaruka ziterwa n’isuku nke zirimo indwara.
By’umwihariko Uturere twasabwe gukangurira abaturage bose kugira ubwiherero mu ngo zabo bitarenze uku kwezi kwa Kanama 2016 nk’uko iyi nkuru dukesha urubuga rw’Intara ikomeza ivuga.
[xyz-ihs snippet=”google-pub”]
Inama yavuze kandi ku iyishyuzwa ry’imyenda ya SACCO na VUP iri mu bukererwe, hemezwa ko urutonde rw’abakozi bafashe kuri izo nguzanyo bazaba batarishyura muri uku kwezi kwa kanama rwashyikirizwa ubuyobozi b’Intara kugira ngo bakurikiranwe.
Mu bantu bavuzwe ko bafashe izo nguzanyo harimo abakozi b’Imirenge, Utugari, Abarimu, Abaforomo n’abandi.
Kanda hano ujye ubona amakuru yihuse kandi kugihe kuri Facebook no kuri twitter
@bwiza.com
