Umugaba Mukuru w’Ingabo za AFC/M23 (ARC) akanaba umuhuzabikorwa wa gisirikare muri iri huriro, Général-Major Sultani Makenga, kuri uyu wa Kane tariki ya 30 Mata yayoboye umuhango wo gusoza icyiciro cya kabiri cy’amahugurwa y’ingengabitekerezo agenewe abanyamuryango ba AFC/M23 bazwi nk’aba-Cadres.
Aya mahugurwa yiswe “Intake 002 Uongozi Bora, yitabiriwe n’aba-cadres babarirwa muri 534. Yaberaga mu kigo cy’amahugurwa cya Kanombe giherereye muri Teritwari ya Rutshuru.
AFC/M23 ivuga ko yateguwe “mu rwego rwo gukomeza kubaka no gukomeza imiyoborere ya politiki n’iy’ubutegetsi bw’uyu mutwe”.
Aba-Cadres bitabiriye ariya mahugurwa baturutse mu bice bitandukanye bigize Teritwari ya Rutshuru, birimo za Groupement, imijyi na Centre z’ubucuruzi bigize iriya Teritwari.
Umuvugizi wa AFC/M23, Lawrence Kanyuka, yatangaje ko binyuze muri iki gikorwa ririya huriro ryongeye kugaragaza ubushake bwaryo bwo guteza imbere imiyoborere ishingiye ku myitwarire myiza, ubumenyi bwa politiki n’ubwitange ku gihugu.
Gen. Makenga mu mpanuro yagejeje kuri bariya banyamuryango, yashimangiye akamaro k’ingengabitekerezo nk’ishingiro ry’ibikorwa bya politiki n’igisirikare bifite umurongo uhamye.
Yabasabye kujya bagaragaza “indangagaciro zirimo inshingano, ubunyangamugayo no kwegera abaturage mu kazi kabo ka buri munsi”, mu gihe igihugu kiri mu bihe by’intambara yavuze ko byatewe n’ubutegetsi bwa Kinshasa.
AFC/M23 yavuze ko uriya muhango ugaragaza kandi “ubushake bwa AFC-M23 bwo gukomeza gushinga imizi mu bice igenzura no kuzamura abayobozi bashya b’aho, bashobora guteza imbere umushinga wa politiki uhamye, utandukanye n’imikorere yanenzwe y’ubutegetsi buriho i Kinshasa.”
Aba-Cadres ba AFC/M23 basoje amahugurwa kuri uyu wa Kane, bariyongera kuri bagenzi babo bayasoje mu cyumweru gishize.
Amakuru avuga ko aba bayobozi bagomba koherezwa mu bice bitandukanye AFC/M23 yabohoye ndetse n’ibyo iteganya kuzabohora mu minsi iri imbere.
