Ishyirahamwe ry’Umupira w’amaguru muri Tanzania (TFF), ryemeje ko ikipe ya Al Hilal Omurman yo muri Sudani izakina muri shampiyona y’icyiciro cya mbere muri Tanzania mu mwaka utaha w’imikino.
Iyi kipe yemerewe gukina shampiyona ya Tanzania nyuma y’igihe kigera ku mwaka muri Sudani hatangiye intambara yatumye ibikorwa bya siporo muri iki gihugu bihagarara.
Umuyobozi ushinzwe itumanaho muri TFF, Clifford Mario Ndimbo, yatangaje ko Al Hilal izakina imikino yose ya shampiyona, ariko ko amanota izagira nta ngaruka agomba kugira ku rutonde rw’uko shampiyona izarangira.
Ibi bivuze ko mu gihe iyi kipe yaba irangije shampiyona ari iya mbere itazigera ihabwa igikombe.
Ndimbo yunzemo ko kuba Al Hilal izakina shampiyona yo mu mwaka utaha bizagirira inyungu umupira w’amaguru wa Tanzania.
Ati: “Turizera ko ubwitabire bwa Al Hilal buzagirira inyungu igaragara shampiyona yacu. Ni ikipe nziza ifite izina rikomeye, bityo ubwitabire bwabo buzazana akanyamuneza ariko bunahe ikizamini amakipe yacu. Ikindi kuba shampiyona ya Tanzania izagira ibitangazamakuru bindi biyikurikirana bizatuma amafaranga twiciza yiyongera”.
Usibye Al Hilal, abasifuzi b’abanya-Sudani bamaze igihe bahererwa amahugurwa y’imisifurire muri Tanzania na bo mu mwaka utaha w’imikino bazemererwa gusifura shampiyona y’iki gihugu.
