Umutwe w’iterabwoba ugendera ku mahame ya kisilamu, Al-Shabab wemeje ko ariwo wagabye igitero cyahitanye umusirikare wa Amerika, gikomeretsa abandi bane i Jubaland, muri Somalia.
Iki gitero cyagabwe na Al-Shabab i Jubaland, aho abasirikare ba Leta Zunze Ubumwe za Amerika bakambitse, bakaba bafasha igisirikare cya Somalia guhangana n’uyu mutwe ufatwa nk’uwiterabwoba.
Nk’uko BBC ibitangaza, ngo ni umusirikare wa mbere w’umunyamerika umenyekanye ko yaguye mu mirwano muri Somalia kuva mu kwezi kwa Gatanu kw’umwaka ushize.
Prezida Donald Trump arihanganisha umuryango wabuze uwabo, agira ati “ Ibitekerezo byanjye n’amasengesho yacu ari kumwe n’umuryango wabuze umukozi wacu wishwe n’abandi bagakomereka muri Somalia”.
Abasirikare barenga 500 ba Amerika bafatanya n’ab’umuryango wa Afurika Yunze ubumwe mu kugarura amahoro muri Somalia ikomeje kuzongwa n’ibitero bya Al-Shabab.
