Komisiyo ishinzwe amatora muri Repubulika Iharanira Demokarasi ya Congo (CENI) yatangaje kuri uyu wa Kane tariki ya 20 Ukuboza 2018, ko amatora y’umukuru w’igihugu yari ateganyije ku wa 23 uku kwezi yigijwe inyuma ho icyumweru, akazaba kuri 30 Ukuboza 2018.
Umukandida Perezida Theodore Ngoy yavuze ko Komisiyo ishinzwe amatora yababwiye ko amatora atazabera igihe cyari giteganije mu gihe bo bari bakomeje ibikorwa byo kwiyamamaza hirya no hino mu gihugu.
Nk’uko BBC ibitangaza, ngo amatora yaharitswe bitewe na bimwe mu bikoresho byari kwifashishwa mu matora byafashwe n’inkongi y’umuriro, ubwicanyi bukorwa hirya no hino hamwe n’icyorezo cya Ebola.
Ku wa Gatatu tariki ya 19 Ukuboza 2018, umuvugizi w’aka kanama gashinzwe amatora yari yatangaje ko aya matora ashobora kutazaba ku gihe cyari cyarateganijwe ngo mu gihe ibikoresho byaba bitararangira kwegeranywa.
Amamashini ibihumbi yari kwifashishwa mu matora yangijwe n’inkongi y’umuriro yafashe aho zari zibitse mu cyumweru gishize i Kinshasa. Kugeza iyi saha Perezida Kabila wagombaga kuva ku buyobozi mu 2016 akaba akomeje kuyobora iki gihugu.
Â
