Akanama k’ingabo ziri mu butumwa bw’amahoro bw’Umuryango wa Afurika Yunze Ubumwe muri Somalia (AMISOM) gashinzwe iperereza, kamaze kwemeza ko abasirikare ba Uganda baburimo bishe abasivili 7 tariki ya 10 Kanama 2021, kanemeza ko bagiye gukurikiranwa n’ubutabera.
Aba basirikare ba Uganda bishe aba banya-Somalia mu gace ka Golweyn ubwo bari bamaze kugwa mu mutego w’umutwe w’iterabwoba wa Al Shabaab umaze igihe uhungabanya umutekano w’iki gihugu kiri mu ihembe rya Afurika.
Uwo munsi, abasirikare ba Uganda bamaze igihe kibarirwa mu masaha barasana n’abarwanyi ba Al Shabaab, hapfamo umusirikare umwe, abandi babiri barakomereka.
AMISOM mu butumwa yari yanditse kuri Twitter nyuma ikaza kubusiba, yari yatangaje ko abarwanyi b’uyu mutwe w’iterabwoba baguye muri iyi mirwano bo ari 7, abandi benshi barakomeretse.
Guverineri w’akarere ka Lower Shabelle kabereyemo iyi mirwano, Abdulkadir Mohamed Nur yemeje ko aba basivili biciwemo ariko AMISOM yirinze kugira icyo ibivugaho mu gihe iperereza ritari ryagakozwe.
Kuri uyu wa 22 Ukwakira, aka kanama kemeje ko abo byari bizwi ko ari abarwanyi ba Al Shabaab bishwe ari abasivili. Kati: “Akanama gashinzwe iperereza…kasanze kandi kababajwe n’uko abantu 7 bishwe ari abasivili kandi imyitwarire y’abasirikare babigizemo uruhare itubahirije amategeko ya AMISOM.”
Aka kanama kanzuye ko Guverinoma ya Uganda izasura imiryango y’abishwe, ibihanganishe kandi ko aba basirikare bagize uruhare muri izi mfu bose bagiye gukurikiranwa n’urukiko rwa gisirikare rwabo, urubanza rukazabera muri Somalia.
Abacamanza b’uru rukiko ngo bamaze kugera muri Somalia kugira ngo bategure urubanza rw’aba basirikare. Gusa ntabwo umubare w’abagomba kuburanishwa watangajwe.
