Angelina Mukandutiye yasabiwe gufungwa imyaka 20

Bwavuze ko nubwo yemera icyaha, ariko ukwemera kwe kutuzuye bityo adakwiye kugabanyirizwa igihano.

Mu maburanisha yabanje, Mukandutiye yavuze ko yagize uruhare mu kwinjiza abakobwa muri FLN irwanya u Rwanda.

Mukandutiye ni we mugore rukumbi ureganwa na Rusesabagina. Mukandutiye w’imyaka 70, yavuze ko yari umwalimukazi kandi ko kuva mu 1986 – 1994 yari ushinzwe amashuri (inspectrice) muri Nyarugenge i Kigali, ngo akaba umugore wa mbere wahawe uwo mwanya mu Rwanda.

Mukandutiye yavuze uko yahunze u Rwanda mu 1994 akajya mu cyari Zaïre agatatana n’umuryango we, agahunguka mu 1997 akaba iwabo mu majyaruguru y’u Rwanda.

Gusa avuga ko yongeye guhunga mu 1998 kuko intambara y’abacengezi irangiye “habayeho guhiga abahungutse bava muri Congo.”

Ati: “Rwose pe, nabonye nta mutekano ngize nsubira muri Congo, nasanze impunzi muri Rutshuru na Masisi ni ho nabaye, n’ubu nageze ino mvuye muri Masisi.”

Yavuze ko umutwe witwaga ALIR (Armée de Libération du Rwanda) wasenyutse mu 2000 hakavuka FDLR ibizeza kuzabacyura mu Rwanda.

Abajijwe icyo yakoraga, ati: “Nari impunzi isanzwe nari njyenyine nirwanaho, iyo habaga agahenge nigishaga nk’abana n’abagore gusoma no kwandika.”

Yasobanuye ko mu 2016 FDLR yacitsemo ibice kubera intego z’abayitegeka, hakavamo CNRD-Ubwiyunge ya Irategeka Wilson, waje kumuha umwanya wa komiseri w’iterambere n’umuryango, ibyo yavuze ko ari nka minisiteri.

Yafatiwe muri Repubulika Iharanira Demukarasi ya Congo azanwa mu Rwanda.