APR FC yatsinze Amagaju ibitego 3-1, irangiza igice kibanza cya shampiyona nta mukino n’umwe itsinzwe.
Iyi kipe y’Ingabo z’Igihugu yari yasuye Amagaju, mu mukino w’umunsi wa 15 wa shampiyona wabereye kuri Stade Mpuzamahanga ya Huye.
Ibitego bibiri byo mu gice cya mbere cy’umukino bya rutahizamu Victor Mbaoma n’icyo myugariro Dushimimana Janvier yitsinze ni byo byafashije APR FC kwegukana amanota atatu y’uyu mukino.
Amagaju yabonye impozamarira ku munota wa 52 biciye kuri Niyonkuru Claude.
Gutsinda uyu mukino byatumye APR FC yuzuza amanota 33, ikomeza kuyobora by’agateganyo urutonde rwa shampiyona.
Iyi kipe y’Ingabo z’Igihugu yasoje imikino ibanza nta mukino n’umwe utsinzwe, kuko yatsinze icyenda inganya itandatu.
Ni mu gihe rutahizamu wayo Victor Mbaoma yahise yuzuza ibitego 12 amaze gutsinda, nta gihindutse akaba ashobora kurangiza igice kibanza cya shampiyona ayoboye abamaze gutsinda ibitego byinshi.
