Ikipe ya Bayern Munich yaraye yegukanye Igikombe cy’Isi cy’ama-Clubs cyari kimaze iminsi kibera muri Qatar, nyuma yo gutsinda ku mukino wa nyuma Tigre yo muri Mexique igitego 1-0.
Iki gitego cyo ku munota wa 59 cya myugariro w’Umufaransa, Benjamin Pavard, cyari gihagije ngo Bayern Munich y’umutoza Hans Flick itware igikombe cya gatandatu mu mwaka umwe w’imikino.
Yacaga agahigo ka FC Barcelona yabigezeho ubwo yatwaraga ibikombe byose yakinnye muri 2011 itozwa na Pep Guardiola.
Uretse Bayern Munich yatwaye iki gikombe, inkuru ikomeje kuvugwa cyane hano ku mugabane wa Afurika ni iya Al Ahly yo mu Misiri yatwaye umwanya wa Gatatu, nyuma yo gutsinda kuri penaliti 3-2 Palmeiras yo muri Brésil.
Byari nyuma y’uko amakipe yombi yari yarangije iminota yose y’umukino anganya 0-0.
Muri uyu mukino umuzamu akanaba Kapiteni wa Al Ahly, Mohamed El Shenawy, yabaye intwari nyuma yo gukuramo Penaliti ebyiri, zirimo iya Felipe Melo na Rony Tame, mu gihe Luiz Adriano yayitaye hanze y’izamu.
Al Ahly ku rundi ruhande na yo yahushije Penaliti ebyiri binyuze kuri Amr El-Sulaya na Marwan Mohsen.
