Ikipe ya Real Madrid yo mu gihugu cya Espagne, yatangaje ko myugariro Sergio Ramos agomba kuyivamo nyuma y’imyaka 16 yari amaze ayikinira.
Uyu mugabo yari umukinnyi wa Real Madrid kuva muri 2005, nyuma yo kuyigeramo akiri muto cyane akubutse mu kipe ya Sevilla FC.
Ramos yari Kapiteni wa Real Madrid kuva muri 2015, asimbuye umunyezamu Iker Casillas wari umaze kuyivamo.
Nyuma y’imyaka 16 uyu myugariro ufatwa nk’umwe mu ba mbere ku Isi yari amaze muri Real Madrid, iyi kipe yatangaje ko batandukanye.
Real Madrid mu itangazo ryayo yavuze ko kuri uyu wa kane ari bwo haba umuhango wo gusezera kuri Sergio Ramos, ukaza gukurikirwa n’ikiganiro uriya mukinnyi agirana n’itangazamakuru.
Mu myaka 16 Sergio Ramos yari amaze muri Real Madrid, yayikiniye imikino 671 ayitsindiramo ibitego 101.
Uyu mugabo yatwaranye na Real Madrid ibikombe 23, birimo bitanu bya shampiyona ya Espagne na bine bya UEFA Champions league.
Byitezwe ko umunya-Brésil Marcelo ari we umusimbura nka Kapiteni mushya wa Real Madrid.
