Perezida wa Brazil, Jair Bolsonaro kuri uyu wa 16 Mata 2020 yirukanye Minisitiri w’Ubuzima bari bamaze ibyumweru bitatu batumvikana ku ngamba zo gukumira ikwirakwira ry’indwara y’icyorezo ya Covid-19.
Minisitiri w’Ubuzima, Luiz Henrique Mandetta yategetse abaturage bo muri iki gihugu ko bahagarika ibikorwa, bakaguma mu rugo kugira ngo iki cyorezo gikumirwe. Yabasabye kandi kubahiriza intera ya metero hagati y’umuntu n’undi.
Perezida Bolsonaro byaramurakaje, na we ategeka abaturage gusubira mu mirimo yabo, areba ku bukungu bw’igihugu kuruta ubuzima bw’abaturage. Ibyo yarabishimangiye nk’uko bigaragara mu nkuru ya The Guardian aho uyu Mukuru w’Igihugu yavuze ko :”Aho kugira ngo ubukungu buhungabane, ubuzima bwabigenderamo.”
Minisitiri Mandetta n’abaguverineri ba leta 27 bamaganye itegeko rya Perezida Bolsonaro bitewe n’uko ryongerera akaga Brazil, impaka no kutumvikana bikaba bimaze ibyumweru bitatu.
Brazil imaze kugaragaramo abanduye Covid-19 barenga 30,425, abamaze gupfa barenga 1,924 kandi imibare igaragaza kuzamuka cyane kw’abandura n’abapfa bikaba biteye impungenge ku buzima bw’abatuye igihugu.
