Brésil itsinze Espagne, yegukana umudari wa zahabu wa 2 wikurikiranya mu mikino Olempike

Ikipe y’igihugu ya Brésil y’abatarengeje imyaka 23, yegukanye umudari wa zahabu mu mupira w’amaguru mu mikino Olempique iri kubera i Tokyo mu Buyapani, nyuma yo gutsinda ku mukino wa nyuma Espagne ibitego 2-1.

Umukino wose waranzwe no kurema uburyo bwinshi bw’ibitego ku ruhande rwa Brésil ugereranyije na Espagne.

Iyi kipe iyobowe na Dani Alves wakanyujijeho mu makipe atandukanye cyane FC Barcelona, yafunguye amazamu mu gice cya mbere cy’umukino ibifashijwemo na Matheus Cunha, nyuma y’uko Richarlison yari amaze guhusha penaliti.

Espagne yishyuye iki gitego mu ntangiriro z’igice cya kabiri ibifashijwemo n’ishoti riremereye rya Mikel Oyarzabal, mbere y’uko Malcolm atsindira Brésil igitego cy’intsinzi mu minota ya nyuma y’umukino.

Brésil yaherukaga kwegukana umudari wa zahabu muri iyi mikino ubwo yaberaga i Rio do Jeneiro muri 2016, itsinze u Budage kuri za penaliti nyuma y’uko iminota yose y’umukino yari yarangiye amakipe yombi anganya igitego 1-1.

Espagne nyuma yo kuba iya kabiri yegukanye umudari wa Silver, mu gihe uwa Bronze watwawe na Mexique nyuma yo gutsinda u Buyapani mu mukino wabaye ejo.

Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]