Hospitali kuu ya Ngozi, iliyoko katika mkoa wa Ngozi nchini Burundi, inakabiliwa na hali ngumu kutokana na upungufu mkubwa wa madaktari — huku waliopo nao wakihama kutafuta kazi kwingineko.
Tatizo hili linasababishwa na ukosefu wa uwezo wa serikali kuwalipa madaktari bingwa mshahara unaolingana na kazi wanayofanya, pamoja na uhaba wa vifaa muhimu vya tiba vinavyowawezesha kufanya kazi kwa ufanisi.
Uongozi wa hospitali unasema kuwa ndani ya kipindi cha mwaka mmoja tu, zaidi ya madaktari bingwa wanane wameshaacha kazi, wengi wao wakielekea nchi jirani kutafuta kazi zenye mishahara mizuri na vifaa bora vya kazi.
Kutoweka kwa madaktari bingwa kumesababisha kuporomoka kwa viwango vya huduma za afya, ambapo wagonjwa hawahudumiwi ipasavyo na wengine kulazimika kusafirishwa hadi hospitali zilizo mbali ili kupata matibabu stahiki.
Mkurugenzi wa hospitali hiyo, Guillaume Ntawukuriryayo, alisema: “Kuna changamoto nyingi katika kuwapokea na kuwahudumia wagonjwa kwa kiwango kinachostahili.”
Ili kutatua changamoto hii kwa njia ya kudumu, uongozi wa hospitali umetangaza kuwa ifikapo mwaka wa 2026, wataajiri madaktari bingwa wanne wapya watakaokuwa na ujuzi unaohitajika kwa mahitaji maalum ya hospitali ya Ngozi.
Kwa sasa, hospitali inategemea madaktari waliomaliza mafunzo hivi karibuni, ambao hawana uzoefu wa kutosha, jambo linalosababisha matatizo katika kutibu magonjwa magumu.
Wananchi wa eneo la Ngozi wanaiomba serikali na viongozi wa hospitali kuchukua hatua za haraka kurejesha imani ya wananchi katika huduma za afya na kuzuia vifo vinavyoweza kuepukika kutokana na huduma duni.
