Abantu bagera kuri bane bakomerekeye mu gitero cya grenade cyagabwe mu gitondo cyo kuri uyu wa Gatatu ahategerwa imodoka za Otraco I Bujumbura mu gace ka Ngagara.
Igipolisi cy’u Burundi cyatangaje ko abantu babiri bikekwa ko ari bo bagabye iki gitero batawe muri yombi ndetse bakaba bafatanywe n’indi grenade. Cyongeyeho ko uwateye iyo grenade yari arimo agenda n’amaguru agahita ahungira muri quartier ya 6 yo muri Zone Ngagara.
Umuvugizi w’igipolisi wungirije, Moise Nkurunziza, yatangaje ko umuntu bikekwa ko yari amaze iminsi atera ibyuma abantu biganjemo abana bo mu mihanda n’abazamu mu mujyi wa Bujumbura, nawe yatawe muri yombi.
Mu gihe kitageze mu byumweru bibiri nk’uko BBC dukesha iyi nkuru ivuga, ngo abantu 8 bamaze kugwa mu bitero bya grenade, mu gihe abakabakaba 100 bakomeretse.
Kuri uyu wa Mbere ushize nk’uko iyi nkuru ikomeza ivuga, minisitiri w’umutekano w’u Burundi, Alain Guillaume Bunyoni, yatangaje ko ibyo bitero bya grenade ari iby’iterabwoba, yongeraho ko ababikora bagiye guhagurukirwa.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
