Umunyarwanda ucuruza inyama z’ingurube muri Zone Ndava, Komini Buganda, mu Ntara ya Cibitoke mu gihugu cy’u Burundi amaze iminsi itandatu yaraburiwe irengero, aho bivugwa ko hari umuntu wabanje kumuhamagara kuri telephone mbere yo kubura.
Uyu mugabo uvugwa ni uwo bahimba Mwarabu, bivugwa ko yahamagawe kuwa Kabiri ushize akajya aho bari bamuhamagaye, ariko kuva icyo gihe atongeye kugaragara.
Ababizi baragira bati “ Kuwa Kabiri, yakiriye telephone imubwira ko bamuboneye ingurube ikuze igurishwa. Ubwo yafashe amafaranga 400,000 aragenda. Kuva icyo gihe nta muntu wongeye kumubona. Twumvise ko yinjijwe mu modoka yo mu bwoko bwa PROBOX ariko ntituzi uwari uyitwaye. ..umuntu bikekwa ko yamuteze umutego arafunze.”
Kuri ubu nk’uko iyi nkuru dukesha RPA ivuga, biravugwa ko abaturage bo muri Zone Ndava bari mu bwoba bwinshi ndetse nta wutinyuka kwidegembya kure y’iwe mu masaha y’ijoro.
Uyu Munyarwanda witwa Mwarabu, washakanye n’Umurundikazi, yari amaze imyaka myinshi aba muri iyi Zone ya Ndava nk’uko iyi nkuru isoza ivuga.
Kurikira ibiganiro n’amavidewo binyura kuri Bwiza TV
