Rayon Sports Women Football yatsinze AS Kigali ibitego 2-1, iba incuro ya mbere ishoboye gutsinda iriya kipe y’abanyamujyi.
Amakipe yombi yari yahuriye mu mukino w’agapingane w’umunsi wa 13 wa shampiyona wabereye kuri Kigali Pele Stadium.
Ni umukino yaje gukina arwanira umwanya wa mbere, dore ko yanganyaga amanota 34 ndetse n’umubare w’ibitego yari azigamye (yombi yari azigamye 49).
Umunota wa munani w’umukino wari uhagije ngo Rayon Sports yatwaye AS Kigali abakinnyi benshi ifungure amazamu ibifashijwemo na Nibagwire Libelle watsindaga abanyamujyi yahoze abereye Kapiteni.
Ni ku mupira yari ahawe n’umunya-Malawi Mary Chavinda.
Igice cya mbere cy’umukino cyarangiye Murera iri imbere n’igitego 1-0.
Rayon Sports yatsinze igitego cya kabiri ku munota wa 58 ibifashijwemo na Mukeshimana Dorothée na we wakinaga na AS Kigali WFC yahozemo, nyuma y’iminota itatu uyu rutahizamu amaze guhusha penaliti.
Impozamarira ku ruhande rw’abanyamujyi yatsinzwe na Ukwinkunda Jeannette ku munota wa 75 w’umukino.
Intsinzi yo kuri uyu wa Gatandatu yatumye Rayon Sports ihita ifata umwanya wa mbere n’amanota 37; isiga AS Kigali ya kabiri amanota atatu.
