Guverineri w’Intara ya Kivu y’Amajyaruguru, Lt. Gen. Constant Ndima ashingiye ku byo yabwiwe n’abashakashatsi mu by’ubumenyi bw’ibiri mu nda y’Isi, yavuze ko ikirunga cya Nyiragongo gishobora kongera kurukira mu bice bitandukanye by’umujyi was Goma no mu kiyaga cya Kivu.
Byatumye uyu muyobozi afata icyemezo cyo kwimura abatuye muri uyu mujyi guhera kuri uyu wa 27 Gicurasi 2021, mu biturage bigera mu 10, ari byo: Majengo, Mabanga y’Epfo, Mabanga ya Ruguru, Virunga, Bujovu, Kahembe, Mikeno, Mapendo, Murara n’agace kegereye cyane iki kirunga.
Gen. Ndima mu nkuru dukesha Radio Okapi, yagize ati: “Bavandimwe, abatuye i Goma no mu nkengero zayo, amakuru mashya arebana n’imitingito n’ihinduka ry’ubutaka agaragaza ko hari magma munsi y’igice cy’umujyi wa Goma kugeza munsi y’ikiyaga cya Kivu.”
Mu gihe Nyiragongo yaba yongeye kuruka nk’uko Gen. Ndima yabivuze, byitezwe ko amahindure yatembera muri ibi biturage byavuzwe haruguru, igasenya ibikorwa bitandukanye birimo inzu n’ibikorwaremezo.
Nyiragongo ibaye irukiye muri Kivu, byitezwe ko amahindure yakwanduza amazi, yahura na gaze (methane) iri muri iki kiyaga, bikaba byabyara umuriro udasanzwe.
Mu rwego rwo kwirinda izi ngaruka zose hakiri kare, ubuyobozi bwafashe icyemezo cyo kwimurira aba baturage bose mu mujyi wa Sake uri mu burengerazuba wa Goma, muri Kivu y’Amajyaruguru.
Gen. Ndima yasabye abaturage gukomeza gukurikirana amakuru, bakamenya icyo ubuyobozi bubifitiye ububasha bubasaba, mu rwego rwo kwirinda ingaruka z’ibi biza (imitingito cyangwa iruka ry’ikirunga).
Ikirunga cya Nyiragongo giherutse kuruka tariki ya 22 Gicurasi 2021, gitera abatuye i Goma barenga 25,000 kwimukira i Sake n’i Rubavu mu Rwanda.
Ubu inkurikizi z’iri ruka zikomeje ni imitingito ya hato na hato, ikomeje gusenya ibikorwaremezo nk’imihanda n’inzu z’abaturage. Bitewe n’ubwoba bw’ingaruka zayo, bamwe mu batuye i Goma barimo guhungira mu Rwanda no mu mujyi wa Bukavu uri mu Ntara ya Kivu y’Amajyepfo.
Kurikira ibiganiro n’amavidewo binyura kuri Bwiza TV
