Ikipe y’igihugu ya Cap-Vert yahaye umukoro ukomeye Amavubi y’u Rwanda kugira ngo abone itike y’Igikombe cya Afurika, nyuma yo gutsinda Caméroun ibitego 3-1.
Hari mu mukino wa gatanu wo mu tsinda F wabereye i Praia kuri uyu wa Gatanu.
Ibitego bya Kuca, icya myugariro Macky Bagnack witsinze n’icya Kapiteni Ryan Mendez byari bihagije kugira ngo Cap-Vert ikure amanota atatu kuri Caméroun yatsindiwe impozamarira na Pierre Kunde.
Gutsinda Caméroun byatumye Cap-Vert igira amanota arindwi, ifata umwanya wa kabiri mu tsinda F.
Amavubi yasigiwe umusozi wo kurira
Magingo aya ikipe y’igihugu ‘Amavubi’ iri ku mwanya wa gatatu n’amanota atanu, imbere ya Mozambique iri ku mwanya wa nyuma n’amanota ane.
Mu mikino ya nyuma yo mu tsinda Caméroun izahura n’Amavubi, Mozambique ihure na Cap-Vert i Maputo.
Amavubi kugira ngo akomeze arasabwa mbere na mbere gutsinda Caméroun, atitaye ku bizava mu mukino wa Mozambique na Cap-Vert.
Gutsinda Cameroun ntibihagije kuko bizasaba gusengera na Mozambique igatsinda Cap-Vert.
Mu gihe ariya makipe yombi yanganya u Rwanda bwo rwaba rusabwa gutsinda Caméroun ibitego 5-0 kugira ngo rubone itike ya CAN.
Gutsindwa kw’Amavubi, kunganya kwayo no gutsinda kwa Cap-Vert bisobanuye ko indoto z’Abanyarwanda zo kwitabira CAN zizarangirira i Douala muri Caméroun.
