Centrafrica: Abagera kuri 300 bigaragambije bamagana Perezida Touadéra

Abaturage bo muri Repubulika ya Centrafrica bagera kuri 300 kuri uyu wa 27 Kanama 2022 bakoreye imyigaragambyo mu murwa mukuru, Bangui, bamagana umugambi wa Perezida Faustin-Archange Touadéra wo guhinduza Itegekonshinga.

Inkuru ya radiyo mpuzamahanga y’Abafaransa (RFI) igaragaza bamwe muri bigaragambya bari bafite ibyapa bigira biti: “Toudera, ntukore ku Itegekonshinga” na “Igitugu oya”.

Iyi myigaragambyo yateguwe n’ihuriro ry’imiryango iharanira iyubahirizwa ry’Itegekonshinga ryo ku wa 30 Werurwe 2016, ubusanzwe rivuga ko umuntu yemerewe kuyobora iki gihugu manda ebyiri gusa.

Mu minsi ishize, iri huriro ryavuze ko Perezida Touadéra azifashisha ingabo z’u Rwanda ziri muri Centrafrica mu kumurindira umutekano mu gihe azaba ahinduza Itegekonshinga.

Gusa Minisitiri w’ububanyi n’amahanga n’ubutwererane, Dr Vincent Biruta yarabihakanye, avuga ko iki gihugu kidashobora kwivanga muri politiki y’ikindi. Yagize ati: “U Rwanda ntabwo rushobora kwivanga muri bibazo by’imbere birebana na politiki ya Repubulika ya Centrafrica.”

Iyi nkuru bifitanye isano https://bwiza.com/?Centrafrica-Abarimo-uwabaye-Minisitiri-barashaka-kwigaragambya-bamagana-ingabo

Perezida Touadéra ayobora Repubulika ya Centrafrica guhera tariki ya 30 Werurwe 2016. Ari muri manda ya kabiri yatangiye mu mpera za 2021.