Centrafrica: Inyeshyamba zatangije ibitero ku murwa mukuru Bangui

Nyuma y’amasaha 48 u Burusiya busabye ko indege zabwo zajya zigwa zikanahagurukira ku Kibuga cy’iNdege cya Bangui, inyeshyamba zo muri Centrafrica zafashe icyemezo cyo kugaba igitero ku Murwa Mukuru mu gitondo cyo kuri uyu wa Gatatu, itariki 13 Mutarama 2021. Biravugwa ko ingabo z’igihugu zihanganye n’izi nyeshyamba mi bice bitandukanye by’inkengero za Bangui.

Amakuru atandukanye ava muri iki gihugu aravuga ko igitero kuri Bangui cyatangiye mu rukerera kuri uyu wa Gatatu nyuma y’aho inyeshyamba zumviye amakuru ko u Burusiya bushaka gukoresha ikibuga cy’indege cya Bangui mu kongera imbaraga z’igisirikare cya Centrafrica.

Urubuga rwa Afrikmag ruravuga ko inyeshyamba zo mu ihuriro CPC (Coalition des Patriotes pour le Changement) zatangije urugamba ku mpande zitandukanye zerekeza mu murwa mukuru. Zahereye mu gace ka PK12 ahitwa Bégoua mu majyaruguru ya Bangui.

Mu gihe urugamba rwari rwambikanye aha, inyeshyamba na none zacengereye ahitwa Bimbo, mu marembo y’uburengerazuba bwa Bangui.

Byari biteganyijwe ko u Burusiya buzatangira imyimenyerezo ya gisirikare hagati y’itariki 16 Mutarama n’itariki 02 Gashyantare 2021 ku Kibuga cy’Indege cya Bangui. Ku itariki 11 Mutarama nibwo Perezida Poutine yari yasabye uruhushya rwo kugwisha no guhagurukiriza indege z’u Burusiya ku Kibuga cy’Indege cya Bangui.

Ku rundi ruhande, Ibiro Ntaramakuru by’Abongereza, Reuters bivuga ko amakuru y’iki gitero ku murwa mukuru yemejwe na Minisitiri w’Intebe, Firmin Ngrebada.

Mu kwezi gushize, inyeshyamba zari zagabye ibitero mu mijyi ikikije Bangui ariko ntizabasha kugera mu murwa mukuru.

Reuters ikomeza ivuga ko inyeshyamba zashakaga gufata Bangui zateye ari nyinshi ariko zisubizwa inyuma nk’uko Minisitiri w’Intebe mu butumwa yanyujije kuri facebook yabitangaje, asaba abaturage gutuza.

Umwe mu bateye wafashwe nk’uko bigaragara kuri facebook ya Ngrebada

Igihugu cya Centrafrica gikungahaye ku mabuye y’agaciro ya zahabu na diyama kikaba gituwe na miliyoni 4,7 z’abaturage cyakomeje kwibasirwa n’ubugizi bwa nabi kuva uwari Perezida Francois Bozize yakurwa ku butegetsi mu 2013. Ibihumbi by’abaturage byarishwe mu gihe abasaga miliyoni bataye ibyabo.