Ishyirahamwe ry’Umupira w’Amaguru ku Isi (FIFA) ryahannye Chelsea kutazagura abakinnyi mu masoko abiri y’igura ry’abakinnyi ari imbere. Uyu mwanzuro ryawufashe nyuma y’aho bigaragariye ko iyi kipe yo mu Bwongereza yaguze abakinnyi bakiri bato.
Kugeza mu mpera za Mutarama 2020, iyi kipe izaba yemerewe kugurisha abakinnyi ariko yo itemerewe kugira abo igura.
Icyakoze, iyi kipe yahawe iminsi itatu y’ubujurire. Mu gihe yajurira igatsindwa, igomba kwishyura ihazabu y’amayero 460,000(£460,000) na ho Ishyirahamwe ry’Umupira w’Amaguru mu Bwongereza (FA) rihanirwe kuba yarabirebeye. FA izishyura amayero 390,000(£390,000).
Nyuma y’iperereza ryakozwe na FIFA ndetse n’ikinyamakuru cyo mu Bufaransa, Mediapart, hagaragaye ibirego bigera kuri 29. Ibi byose bijyanye no gusinyisha abana batarageza ku myaka 18.
FIFA iravuga muri byo birego harimo n’icy’umunya Burkina Faso, Bertra Traore wakiniye iyi kipe kuva mu 2013 kugeza mu 2017. Kuva mu 2013 kugeza mu 2014, uyu mukinnyi yakiniraga ingimbi z’iyi kipe. Aha ngo Chelsea yabeshye itariki uyu musore yavukiye.
Iki kibazo cyo kutubahiriza amategeko yo kugura abakinnyi kandi cyatumye amakipe yo muri Espagne atatu ahanwa. Real na Atletico Madrid yahanwe mu 2016 mu gihe mukeba wazo, FC Barcelona yari yarahanwe umwaka itagura abakinnyi mu 2014.
