Ikipe ya Chelsea yegukanye UEFA Champions league ya kabiri mu mateka yayo, nyuma yo gutsinda ku mukino wa nyuma Manchester City igitego 1-0.
Hari mu mukino wa nyuma wari utegerejwe n’Isi yose wabereye kuri Estadio de DragĂŁo yo mu mujyi wa Porto muri Portugal.
Igitego cy’Umudage Kai Havertz cyo ku munota wa 42 w’umukino ni cyo cyatandukanyije impande zombi mu minota 100 amakipe yombi yakinnye.
Hari ku mupira uyu musore yari acomekewe na Mason Mount, asiga ab’inyuma ba Man City, acenga umuzamu Ederson Moraes mbere yo gutereka umupira mu nshundura.
Havertz yafunguriye Chelsea amazamu nyuma y’uburyo bukomeye amakipe yombi yari yagiye abona.
Nka Manchester City yahabwaga amahirwe yo gutwara iki gikombe yari yabonye uburyo bukomeye binyuze kuri Riyad Mahrez wananiwe gushyira mu izamu umupira yari ahawe na Sterling, cyo kimwe na Phil Foden washoboraga gufungura amazamu ku munota wa 29 ariko umupira we ugakomwa mu nkokora na Antonio RĂĽdiger.
Ku munota wa karindwi w’umukino bwo Raheem Sterling yari yashoboye gucenga ab’inyuma ba Chelsea n’umuzamu Edouard Mendy, gusa gushyira umupira mu izamu biramunanira.
Chelsea na yo yabonye uburyo bubiri bukurikiranye ku munota wa 14 n’uwa 15, gusa Umudage Timo Werner ananirwa kububyaza umusaruro.
Ikipe ya Manchester City yagarutse mu gice cya kabiri cy’umukino yotsa igitutu izamu rya Chelsea.
Bitandukanye n’igice cya mbere amakipe yombi yakinagamo umukino uringaniye, ikipe ya Manchester City yihariye igice cyose cya kabiri cy’umukino ariko kwishyura birayinanira.
Iyi kipe y’umutoza Pep Guardiola yabonye uburyo butatu bukomeye mu gice cya kabiri, gusa ntihabonekamo na bumwe bumuhesha igitego cyo kwishyura.
Uburyo bwo ku munota wa 68 Cesar Azpilicueta yakijijemo izamu mu gihe Ikary GĂĽndogan yashoboraga gutsinda igitego, ubwo ku munota wa 89 bwa Foden n’ishoti ritunguranye rya Riyad Mahrez ryaciye hejuru y’izamu, nta na bumwe bwigeze buhira Manchester City.
Impinduka zasize Gabriel Jesus, Fernandinho na Sergio Aguero binjiye mu kibuga na zo na cyo zigeze zifasha umutoza Pep Guardiola.
Chelsea na yo yashoboraga gutsinda igitego cya kabiri ku munota wa 72, gusa Christian Pulisic ananirwa gushyira umupira mu izamu ryari rirangaye.
Ikipe ya Chelsea yaherukaga gutwara UEFA Champions league muri 2012, ubwo yatsindiraga ku mukino wa nyuma Bayern Munich ku kibuga cyayo kuri za penaliti, nyuma y’uko iminota isanzwe y’umukino yari yarangiye amakipe yombi anganya igitego 1-1.
Kurikira ibiganiro n’amavidewo binyura kuri Bwiza TV
