Kuri uyu wa Gatatu, Umuyobozi w’Ishami rishinzwe Ubufatanye hagati y’Abasivili n’Abasirikare (Chief J9) mu Ngabo z’u Rwanda, Col Désiré Migambi Mungamba, yatanze ikiganiro ku bitabiriye Ihuriro ngarukamwaka ry’Ubumwe n’Ubudaheranwa; yari ahagarariye Umugaba Mukuru w’Ingabo z’u Rwanda. Iri huriro ryabereye ku cyicaro cy’akarere ka Gasabo, rihuza abayobozi batandukanye mu rwego rwo kuzirikana urugendo rw’u Rwanda mu kubaka ubumwe n’ubudaheranwa.
Col Migambi yatanze ikiganiro ku nsanganyamatsiko igira iti: “Gukomera k’Ubumwe n’Ubudaheranwa.”
Yagaragaje ko ubumwe n’ubudaheranwa ari indangagaciro z’Abanyarwanda za kera, zishingiye ku muco n’amateka by’igihugu, Abanyarwanda basigiwe n’abakurambere. Yavuze ko izo ndangagaciro zifatiye ku rukundo rw’igihugu, amahoro, ubunyangamugayo, iterambere, n’ubupfura.
Yakomeje asobanura ko ubukoloni bwangije izo ndangagaciro z’Abanyarwanda buzana amacakubiri ashingiye ku moko ndetse busenya imiterere y’imiyoborere y’igihugu n’ingabo. Col Migambi yibukije ko imwe mu ntego z’ Ingabo za RPA zatangije urugamba rwo kubohora igihugu mu 1990 kwari ukugarura ubumwe bw’Abanyarwanda, anavuga ko indangagaciro za RPA, ikubiyemo gukunda igihugu, imyitwarire myiza, ubufatanye kudacika intege—byakomeje kuba umusingi w’indangagaciro n’imyitwarire y’Ingabo z’u Rwanda.
Ibiganiro byatanzwe byibanze ku mateka y’u Rwanda no ku nshingano rusange Abanyarwanda bafite yo kurinda ibyagezweho no kwirinda gusubira mu macakubiri.
Abitabiriye basabye ko kwigisha amateka y’u Rwanda byashyirwamo imbaraga cyane cyane mu rubyiruko, hamwe no kurwanya imvugo zicamo Abanyarwanda ibice zikwirakwizwa ku mbuga nkoranyambaga ziba zigamije guhungabanya igihugu.
