Col. Sematama yemeje ko yihuje na Col. Makanika

Col Sematama aherutse kubitangariza radiyo BBC, ubwo umunyamakuru yamubazaga niba koko yarihuje na mugenzi we nk’uko byavugwaga.

Yamusubuje ati: “Yego, ni we turi kumwe.” Abajijwe intego bafite ati: “Ni intego yo kwirwanaho, twaje kwiyunga n’abaturage muri izi ntambara bahura nazo zo kwirwanaho, ntabwo ari ugutera Leta ahubwo ni ukwirwanaho ku bitero biri kwica abaturage. Ibyo ni byo turwana.”

BBC yabajije Col. Sematama niba igisirikare cya RDC kizamuhana, avuga ati: “Ntacyo bimbwiye. Ubundi se icyaha kiruta guta ababyeyi bari mu ngorane, ababyeyi bari gupfa ukabatererana uri umusirikare nyine, urumva icyo cyaha cyo cyahanwa n’iki? Nacyo ni icyaha gikomeye, guta ababyeyi bakaguma gupfa kandi witwa ngo uri umusirikare, uri muri Leta, icyo cyaha ntabwo gikomeye, icyaha ni uguta abaturage.”

Col. Sematama wiyunze na Col. Makanika

Iyi radiyo yabajije Col. Sematama niba we na Col. Makanika bazashobora kurinda abaturage nk’uko babivuga, agira ati: “Cyane tuzabakingira, n’ubundi bari hano, hari abo nasanze hano batujijwe bafite amahoro ubu ngubu muri ino minsi, tuzafatikanya nyine kubakingira nta kibazo.”

Mu mpera za Gashyantare 2021 ni bwo byamenyekanye ko Col Sematama yatorotse igisirikare cya RDC, aho yari Komanda wa Regima 3411 ikorera muri Teritwari ya Masisi mu Ntara ya Kivu y’Amajyaruguru.

Inkuru irambuye ku itoroka rya Col. Sematama http://www.bwiza.com/?Col-Charles-Sematama-yatorotse-igisirikare-cya-RDC

Yakurikiye Col Makanika watorotse igisirikare cya RDC mu mpera z’umwaka w’2019, na we wemereye itangazamakuru ko agiye kurinda umutekano w’abaturage bakomeje kwicwa, Leta irebera.

Col. Makanika yatorotse igisirikare cya RDC mu 2019

Aba basirikare bakomeje kuva mu ngabo za Leta ya RDC mu gihe abagize ubwoko bw’Abanyamulenge buri muri Teritwari ya Uvira mu Ntara ya Kivu y’Amajyepfo batakamba bavuga ko bakomeje kwicwa, gusahurwa no kuvanwa mu byabo n’abarwanyi b’imitwe ya Mai Mai.

Kurikira ibiganiro n’amavidewo binyura kuri Bwiza TV