Covid-19 ikomeje kweguza abayobozi bakomeye mu bihugu bitandukanye

Mu gihe imibare y’abandura ndetse n’abicwa n’indwara y’icyorezo ya Coronavirus (Covid-19) ikomeje kuzamuka mu bihugu bitandukanye ku Isi, bamwe mu bayobozi bakuru batangiye gukuramo akabo karenge, bava mu nshingano bahawe ahanini bitewe n’amakosa bakoze mu guhangana n’iki cyorezo no kubura ibisubizo byakemura iki kibazo.

Iyi nkundura cyatangiriye mu Budage mu mpera za Werurwe 2020, ubwo Minisitiri w’Imari mu Karere ka Hesse, Thomas Schaefer yiyahuye nyuma yo guhangayikira ubukungu bw’igihugu bwaganaga aharindimuka bitewe n’iki cyorezo.

Uyu Minisitiri yafashe uyu mwanzuro yihebye, abona ko atazashobora gusubiza aka karere mu murongo mwiza w’ubukungu. Hakurikiyeho ubwegure bw’abandi bayobozi guhera mu Muryango w’Ubumwe bw’i Burayi kugeza mu bihugu ndetse n’uduce tubigize.

Prof. Mauro Ferrari uyoboye akanama ka EU

Umuyobozi wari uyoboye Akanama k’Ubushakashatsi mu Muryango w’Ubumwe bw’u Burayi, Prof. Mauro Ferrari (ugaragara mu ifoto) yeguye kuri izi nshingano mu ntangiriro za Mata 2020 nyuma yo kudahuza na bagenzi be ku ngamba zafatwa mu guhangana na Covid-19, ubwo yashakaga gushyiraho gahunda ihuriweho yo guhashya iki cyorezo.

Prof. Ferrari akimara kwegura yagize ati: “Ntabwo nashimishijwe na gato n’ingamba EU yafashe zo kurwanya Covid-19. Naje muri ERC (aka kanama) nshyigikiye EU ariko iki kibazo cya Covid-19 cyatumye mpindura ibitekerezo, gusa ndacyashyigikiye ko habaho ubufatanye bw’ibihugu. (SRC: Financial Times)

Minisitiri w’Ubugeni muri New South Wales

Minisitiri w’Ubugeni muri leta ya New South Wales muri Australia, Don Harwin yeguye tariki ya 10 Mata 2020 nyuma y’ikosa ryo kujya mu butembere mu gihe abaturage bose bari basabwa kuguma mu ngo kugira ngo bubahirize amabwiriza yo gukumira ikwirakwira ry’icyorezo cya Covid-19.

Kuri Pasika ni bwo Minisitiri Harwin yafotowe ari kuryoshya ahitwa Pearl Beach, hari inzu ye. Kubera iyi myitwarire yaciwe ihazabu y’1000 cy’Amadolari y’Amerika, atangaza ko yeguye kuko atubahishije inshingano yahawe ndetse n’abo bakorana. (Src: The Guardian)

Minisitiri w’Ubuzima muri Romania yareguye

Minisitiri w’Ubuzima muri Romania, Victor Costache yeguye kuri izi nshingano tariki ya 26 Werurwe 2020 abitewe n’uko muri iki gihugu hari icyuho gikomeye mu rwego rw’ubuzima muri iki gihe cya Covid-19.

Byari biteganyijwe ko muri Romania hazapimwa abantu bari hagati ya miliyoni ebyiri n’enye, Minisitiri Costache anengerwa kuvuga ko ubushobozi bwo gupima igihugu gifite butarenza abantu 2000 ku munsi umwe ndetse no kuba hari abavuzi n’abaganga benshi bandujwe n’abarwayi batigeze bapimwa nk’uko igitangazamakuru Romania Insider cyabitangaje.

Umunyamabanga wa leta ya Brazil yareguye

Wanderson de Oliveira wari Umunyamabanga wa Leta ya Brazil w’Ubuzima yaguye tariki ya 15 Mata 2020 nyuma y’ubwumvikane buke hagati y’Umukuru w’Igihugu, Jair Bolsonaro na Minisitiri w’Ubuzima Luis Henrique Mandetta uherutse kwirukanwa kuri izi nshingano nk’uko Al Jazeera ibivuga.

Mandetta yategetse abaturage kuguma mu ngo kugira ngo birinde ikwirakwira ry’iki cyorezo, Perezida Bolsonaro aramuvuguruza. Byatumye abayobozi guhera kuri ba Guverineri ba leta zigera kuri 37 bashyigikira Mandetta, bamwe barimo Wanderson basa n’abigumuye.

Meya w’ikirwa cyitiriwe Corona

Umuyobozi w’ikirwa cya Saaremaa muri Estonia, Madis Kallas yeguye ashinjwa kugira uruhare mu ikwirakwira ry’iki cyorezo, ubwo yemereraga ikipe ya Volleyball ya Milan yo mu Butaliyani kuhakinira imikino n’indi kipe yo kuri iki kirwa.

Nyuma y’ibyumweru bibiri iyi mikino ibereye kuri iki kirwa, habayeho kuzamuka cyane kw’imibare y’abanduye iki icyorezo, bigera aho Saaremaa ihimbwa izina rya ‘Corona’. Gusa Meya Kallas yegura, yavuze ko ari ikosa rikomeye kuba yaremeye ko iyi mikino ibera ku butaka ayoboye nk’uko BBC yabitangaje kuri uyu wa 20 Mata.

Umuyobozi w’Urwego rw’Ubuzima muri Scotland

Dr. Catherine Calderwood wari uhagarariye Urwego rw’Igihugu rw’Ubuzima muri Scotland yeguye tariki ya 19 Mata 2020 azira kujya mu butembere n’umuryango we ahitwa Earlsferry muri Fife, mu gihe abaturage bose bategetswe kuguma mu ngo mu rwego rwo gukumira ikwirakwira ry’iki cyorezo.

Tariki ya 18 Mata ni bwo igitangazamakuru The Sun cyafotoye Dr. Catherine n’umuryango we bagiye gutembera, maze kirayatangaza. Polisi y’Igihugu yahise imwihanangiriza ku bw’aya makosa, yegura ku munsi wakurikiyeho nyuma y’ibiganiro yagiranye n’abamukuriye.

Nk’uko bigaragara mu mpamvu zeguje aba bayobozi ndetse n’abandi tutakomojeho, harimo kutubahiriza amabwiriza yo gukumira iki cyorezo ndetse n’ubwumvikane buke ku buryo bwo kurwanya Covid-19. Bitewe n’ubukana iki cyorezo gifite, Isi yaba iruhira ubusa mu gihe yaba idahuje umurongo, ibihugu ntibifatanye mu kukirwanya ndetse n’ababituye guhera ku bato kugeza ku bakuru ntibubahirije amabwiriza n’ingamba zashyizweho.