Mu gihe hari imihangayiko yatewe n’icyorezo cya Covid-19, ibikorwa byo kurinda umutekano ndetse no kwivuna abanzi birakomeje hagati y’ingabo z’ibihugu n’imitwe y’iterabwoba, irwanya ubutegetsi cyangwa se inyeshyamba.
Kuri iyi Si, ingabo z’ibihugu ziragaba ibitero ku mitwe y’iterabwoba, na yo nta gutuza irihorera amanywa n’ijoro. Ubutegetsi burahirimbanira kurandura imitwe y’inyeshyamba cyangwa se iburwanya. Burahiga kandi abo bafata nk’ibyihebe bikuru byateza icyuho ku mutekano w’abaturage ndetse n’inyungu bwite zabyo.
Ku mpande zimwe na zimwe birasa no kubikira cyangwa se gutera uwasinziriye bitewe n’uko hari abamaze kumva ko muri iki gihe buri wese ahangayikishijwe na Covid-19 kurusha gushaka kwivuna umwanzi. Urugero rwa hafi ni urw’umutwe wa ISIS (Islamic State of Iraq and Syria) wigeze kubuza abarwayi bawo kugaba ibitero, uhindukira ubasaba gushyiramo imbaraga.
Imitwe yitwaje intwaro n’imgabo z’ibihugu biramaramaje
ISIS
Hashize ukwezi kumwe umutwe w’iterabwoba wa ISIS utegetse abarwanyi bawo kutinjira ku mugabane w’u Burayi bitewe n’icyorezo cya Covid-19 kibwugarije. Bwagize buti: “Umurwanyi wanduye ari i Burayi nagumeyo, utaranduye na we ntabwo agomba kwinjira ku butaka butariho iki cyorezo.”
Abatuye i Burayi bari biteze agahenge bitewe n’iri tangazo ariko hadaciye kabiri, mu ntangiriro za Mata 2020 ubuyobozi bwa ISIS bwongeye gusohora iri tangazo, bwavuze ko Covid-19 itazaca intege ibitero byayo. Itangazo riti: “Ntimubabarire ahubwo nimugabe ibitero muri ibi bihe bya Coronavirus.”
Imitwe y’iterabwoba yegamiye kuri Isilamu ifata Covid-19 nk’igihano ku batarakurikiye iri dini (abakafiri), bityo nayo itagomba kugabanya imbaraga ishyira mu kugaba ibitero nk’uko bigaragara mu nkuru ya Daily Mail yo ku wa 2 Mata 2020.
Mu itangazo uyu mutwe, ishami rikorera muri Afurika yo hagati washyize ku rubuga rwa ‘Aamak Agency’ kuri uyu wa 15 Mata 2020, wigambye igitero ku ngabo za Repubulika Iharanira Demukarasi ya Congo (FARDC) i Tsotsora muri Teritwari ya Beni, ukaba waravuze ko wishe abasirikare b’iki gihugu batatangarijwe umubare. Ni igitero wigambye nyuma y’ibya Tunisia, Nigeria na Libya.
Boko Haram
Uyu mutwe ukunze kwibasira ibihugu biri mu majyaruguru y’Afurika nka Nigeria na Chad, Mali, Cameroon na Nigeria uherutse kwica abasirikare 162 mu minsi ibiri ikurikiranye.
Tariki ya 23 Werurwe 2020, Boko Haram yategeye ingabo za Nigeria mu nzira ubwo zari zigiye kuyigabaho igitero mu gace ka Maiduguru, yica 70 abandi bake basigaye ari bazima ibafata mpiri. Tariki ya 24 Werurwe nabwo uyu mutwe wishe ingabo 92 za Chad barimo abato n’abakuru.
Kuri uwo wa 24 Werurwe, undi mutwe witwa ISWAP (Islamic State for West Africa Province) ushamikiye kuri Boko Haram wagabye igitero ku ngabo za Nigeria mu gace kitwa Gorgi kari muri leta ya Yobe, wicamo 47.
Ingabo z’ibihugu zivuna umwanzi umunsi ku wundi
Guhera kuri Leta Zunze Ubumwe z’Amerika kugeza ku gihugu cyitwa ko giciye bugufi ariko gifite umwanzi wagihungabanyiriza umutekano, ntibyahagaritse urugamba. Mu rugamba rw’iki gihugu cy’igihangange, cyifashisha inzego zitandukanye zirimo ubutasi n’igisirikare, ahanini gishakisha abayobozi b’imitwe y’iterabwoba. Tariki ya 10 Mata 2020 cyongeye gushyira hanze itangazo rya miliyoni 10 z’amadolari z’igihembo ku muntu uzatanga amakuru atuma icyihebe cyitwa Muhammad Kawtharani gifatwa.
Mu gitero cyiswe ‘Boma Anger’ cyayobowe na Perezida wa Chad, Idris Deby tariki ya 2 Mata 2020, ingabo z’iki gihugu zihoreraga zishe abarwayi 76 ba Boko Haram benshi ndetse zifata n’intwaro nyinshi zirimo intoya n’iziremereye. Ni nyuma y’aho aba barwanyi bari bamaze icyumweru kirenga bishe ingabo z’igihugu 92.
Kuva tariki ya 30 Ukwakira 2019 ingabo za Repubulika Iharanira Demukarasi ya Congo (FARDC) zitangije Operasiyo Sokola 2 yo kurandura imitwe yitwaje intwaro yabaye imbogamizi ku mutekano w’uburengerazuba bw’igihugu, iyi operasiyo irakomeje no muri ibi bihe, aho zihanganye cyane n’umutwe wa ADF cyane cyane muri Teritwari ya Beni.
