Cristiano Ronaldo ubarizwa mu ikipe ya AL Nassr yafatiwe ibihano birimo guhagarikwa umukino umwe no gucibwa amande nyuma y’igikorwa kigayitse yakoze.
Uyu munye Portugal arirenza umukino wo kuri uyu wa Kane, nyuma y’uko abafana baririmbye Messi na we akabasubiza agaragaza ikimenyetso gifatwa nk’urukozasoni ku buryo kitemewe muri Arabie Saoudite.
Byabaye mu mukino w’umunsi wa 21 wa Shampiyona yo muri Arabie Saoudite, Al Nassr yahuye na Al Shabab, iyitsinda ibitego 3-2 ariko nyuma yawo Cristiano yibasirwa n’abakunzi ba ruhago.
Uyu mukinnyi akimara gutsinda igitego mu kucyishimira yagaragaje ibihabanye n’umuco w’iki gihugu mu gusubiza abafana.Nyuma yo gukora ibi bimenyetso bifatwa nk’urukozasoni muri iki gihugu, ishyirahamwe rya ruhago ryamuhanishije kumara umukino umwe adakina, anacibwa amande angana ($2,666).
Umukino ari busibe n’uwo Al Nassr yakirimo Al Hazem kuri uyu wa Kane tariki 29 Gashyantare 2024 saa Moya z’umugoroba.
