Myugariro w’umunya-Brésil Dani Alves, yagarutse mu kipe ya FC Barcelona yahoze akinira nyuma y’uko iyi kipe ihawe uburenganzira n’umutoza Xavi Hérnandez.
Dani Alves w’imyaka 38 y’amavuko, yakiniye FC Barcelona hagati ya 2008 na 2016, ayivamo yerekeza muri Juventus yo mu Butaliyani.
Uyu myugariro w’iburyo ufatwa nk’uw’ibihe byose FC Barcelona yatunze mu mateka yayo, byari bimaze igihe bihwihwiswa ko ashobora kugaruka muri iyi kipe, nyuma yo gutandukana n’ikipe y’iwabo muri Brésil yari amaze igihe akinira.
Fabrizio Romano yatangaje ko Dani Alves yemeranyije na FC Barcelona kuyikinira umwaka umwe, gusa hakaba hagitegerejwe ko La liga iha umugisha Transfert ye.
Ikinyamakuru SPORT cy’i Catalunya cyanditse ko Dani Alves yamaze kumvikana na FC Barcelona kuzajya ahembwa iyero rimwe ku Cyumweru.
