Umurambo wa Maj. Jenerali Delphin Kahimbi wari Umugaba Mukuru w’Ingabo wungirije ushinzwe Ubutasi bwa gisikare cya Repubulika Iharanira Demukarasi ya Congo ugiye guhabwa umuryango we kugira ngo ushyingurwe. Ikinyamakuru Taarifa kivuga ko gifite amakuru yizewe ko umurambo wa Jenerali Kahimbi wapfuye kuwa 28 Gashyantare 2020 uzashyikirizwa umuryango ukava mu bubiko bw’ibitaro. Ubusabe bukurikije amategeko bwamaze kugezwa mu Rukiki Rukuru rwa Gisirikare rwa Kinshasa kugira ngo umuryango wa Jenerali Kahimbi uhabwe umurambo we. Ibi kandi nk’uko iyi nkuru ikomeza ivuga, byemewe n’uyobora ibitaro bya gisirikare aho umurambo wa Jenerali Kahimbi ubitswe. Urupfu rwa Gen. Kahimbi ntiruvugwaho rumwe Urupfu rwa Jenerali Kahimbi ntirwavuzweho rumwe. Mu bitangazamkuru bitandukanye byiganjemo ibyo muri Congo, byavuze ko uyu mujenerali wari ikirangirire ku butegetsi bwa Joseph Kabila, yazize “kwiyahura” ubwo yari mu rugo iwe mu Mujyi wa Kinshasa. Ni mu gihe BBC kuwa 29 Gashyantare yatangaje ko umugore wa Jenerali Kahimbi ari we Brenda Kahimbi yari yavuze ko umugabo we yazize indwara y’umutima. Mu kiganiro kuri telefone, umugore we, Brenda Kahimbi, yabwiye Reuters ati: “Yari yagize ikibazo cy’umutima ari mu rugo nuko aza gupfa hashize akanya gato tugeze ku bitaro.” Ubwo byasakaraga ko Jenerali Kahimbi yapfuye, hari nyuma y’iminsi mike ahagaritswe ku kazi ke ndetse bikaba byari byitezwe ko azitaba akanama k’igihugu k’umutekano ngo asobanure ibyo yakekwagaho byo gushaka kubangamira ubutegetsi bwa Perezida, FĂ©lix Tshisekedi. Hari amakuru avuga ko Jenerali Kahimbi yari akurikiranweho guhisha intwaro no kuzitunga bitemewe n’amategeko kandi akaba ngo yari afite umugambi wo guhungabanya umudendezo w’igihugu. Mu nama n’abaminisitiri n’abagize inteko ishinga amategeko kuwa 6 Werurwe 2020, Perezida Tshisekedi bafashe umwanzuro wo gukora iperereza ryigenga ku rupfu rwa Jenerali Kahimbi. Ni ubusabe bwari bwatanzwe na MONUSCO. Kugeza ubu ntiharatangazwa ibyaba byaravuye muri iri perereza ku rupfu rwa Jenerali Kahimbi. Uyu kandi yapfuye mu kwezi yari yarabujijwe kuva mu gihugu, nk’uko abo bantu babiri bo mu nzego zishinzwe umutekano n’abandi babiri bakora mu rwego rw’abinjira n’abasohoka babibwiye Reuters. Gen. Kahimbi washakishwaga n’ubutabera Jenerali Delphin Kahimbi yari asanzwe yarafatiwe ibihano n’umuryango w’ubumwe bw’Uburayi (EU/UE) ku birego byo guhonyora uburenganzira bwa muntu ubwo yayoboraga ibikorwa bya gisirikare byo kurwanya inyeshyamba mu burasirazuba bw’igihugu mu myaka ya 2000 ndetse no mu gihe yari amaze ayobora ubutasi bwa gisirikare. Uwamusimbuye ku butegetsi, FĂ©lix Tshisekedi, yari amaze igihe yotswa igitutu na Leta Zunze Ubumwe z’Amerika ngo akurikirane Jenerali Kahimbi ku birego byo guhonyora uburenganzirwa bwa muntu. Mu Kuboza mu 2016, Kahimbi yashyizwe ku rutonde rw’umuryango wa EU rw’abategetsi ba Kongo bafatiriwe imitungo ndetse batemerewe kugirira ingendo mu bihugu bigize EU.
