Mu myaka mike ishize, drone za gisirikare zavuye ku kuba ibikoresho byifashwa mu butasi gusa, zihinduka imwe mu ntwaro z’ingenzi zikoreshwa ku rugamba.
Uko ikoranabuhanga rigenda ritera imbere ni na ko ibihugu bikomeye ku isi birushaho gushora amafaranga menshi mu gukora za drone zishobora kugenzura ibibera ku rugamba, kurasa intego z’abanzi no gukora ibikorwa bya gisirikare bitabangamiye ubuzima bw’abasirikare benshi.
Intambara iri hagati y’u Burusiya na Ukraine ni yo yagaragaje cyane imbaraga za drone, aho impande zombi zikoresha izi ndege nto zitagira abapilote mu butasi, ibitero ndetse no gusenya ibikorwaremezo by’ingenzi.
Mu Burasirazuba bwa Repubulika Iharanira Demokarasi ya Congo na ho drone zimaze kuba igikoresho cyifashishwa n’impande zihanganye mu gukurikirana ibikorwa by’umwanzi no kugaba ibitero.
Mu Burasirazuba bwo Hagati, amakimbirane hagati ya Iran na Leta Zunze Ubumwe za Amerika ndetse n’abo bafatanyije na yo yerekanye uko drone zishobora guhindura uburyo intambara zirwanwa.
Izi drone 10 zibarirwa mu za gisirikare zigezweho kandi zikomeye ku isi muri uyu mwaka wa 2026.
1. MQ-9 Reaper
MQ-9 Reaper ni imwe muri drone zizwi cyane ku Isi. Ikorwa n’ikigo General Atomics Aeronautical Systems cyo muri Amerika.
Iyi drone ishobora kumara amasaha arenga 27 iri mu kirere, kandi igatwara misile za Hellfire ndetse na bombe ziyobowe n’ikoranabuhanga.
Ikoreshwa cyane mu butasi no mu bitero byibasira intego zatoranyijwe.
2. Bayraktar Akıncı
Bayraktar Akıncı ni drone ikomeye yakozwe na sosiyete Baykar yo muri Türkiye.
Ifite ubushobozi bwo gutwara toni zirenga imwe y’intwaro kandi ishobora gukoresha radar zigezweho. Yagaragaje ubushobozi bukomeye mu ntambara zitandukanye, ikaba ifatwa nk’imwe muri drone zikomeye zakozwe n’igihugu kitabarizwa mu burengerazuba bw’Isi.
3. Bayraktar TB2
Bayraktar TB2 yabaye icyamamare cyane nyuma yo gukoreshwa na Ukraine mu ntambara ihanganyemo n’u Burusiya.
Nubwo ari nto ugereranyije na Akıncı, ifite ubushobozi bwo gukora ubutasi no kugaba ibitero byihuse ku ntego ziri kure.
Igiciro cyayo kiri hasi ugereranyije n’izindi drone zikomeye, ari na byo byatumye ibihugu byinshi biyigura.
4. Shahed-136
Shahed-136 ikorwa n’uruganda rwa HESA rwo muri Iran.
Ni drone yitwa “kamikaze” cyangwa “drone y’ubwiyahuzi” kuko iba igamije kwikubita ku ntego ikayisenya.
Yamamaye cyane mu ntambara y’u Burusiya na Ukraine nyuma y’uko Moscou itangiye kuyikoresha ku bwinshi.
Umwihariko wayo ni uko ihendutse kuyikora, ariko ikaba ishobora gutera igihombo kinini ku mwanzi.
5. Wing Loong III
Wing Loong III ikorwa n’ikigo Aviation Industry Corporation of China (AVIC) cyo mu Bushinwa.
Ifite ubushobozi bwo kuguruka intera ndende cyane no gutwara intwaro nyinshi kurusha izayibanjirije.
U Bushinwa buyifata nk’umunywanyi ukomeye wahangana na MQ-9 Reaper ya Amerika.
6. CH-5 Rainbow
CH-5 Rainbow na yo ikorwa na China Aerospace Science and Technology Corporation (CASC).
Ishobora kuguruka amasaha arenga 60 itamanutse, ibintu biyigira imwe muri drone zifite uwo mwihariko ku Isi. Ikoreshwa mu butasi, kugenzura imipaka no kugaba ibitero.
7. Orion-E
Orion-E ni drone ikorwa n’uruganda Kronshtadt Group rwo mu Burusiya.
Ni yo drone ya mbere y’Abarusiya yakozwe kugira ngo ikore ibikorwa byo kugaba ibitero no gukora ubutasi mu buryo buhoraho.
Yakoreshejwe mu ntambara zitandukanye zirimo n’iyo muri Ukraine.
8. S-70 Okhotnik-B
S-70 Okhotnik-B ni imwe muri drone zigezweho cyane zakozwe n’u Burusiya.
Ikozwe mu buryo bugabanya amahirwe yo gutahurwa na radar (stealth technology) kandi ishobora gukorana n’indege z’intambara nka Su-57.
Abasesenguzi benshi bayifata nk’intambwe ikomeye mu rugendo rw’u Burusiya rwo gukora drone z’intambara zifite ubwenge buhanitse.
9. MQ-28 Ghost Bat
MQ-28 Ghost Bat ikorwa na Boeing Australia.
Yagenewe gukorana n’indege zitwarwa n’abapilote nk’umufasha wazo ku rugamba.
Ishobora gukora ubutasi, kurinda indege z’intambara no gufasha mu kugaba ibitero.
Ni imwe kandi muri drone zigaragaza icyerekezo cy’intambara zo mu gihe kizaza, aho drone zizakorana n’abantu mu buryo bwa hafi cyane.
10. Akinci-C
Akinci-C ni verisiyo nshya kandi yongerewe ubushobozi ya Bayraktar Akıncı.
Ifite moteri zikomeye kurushaho, ubushobozi bwo gutwara intwaro nyinshi ndetse n’ikoranabuhanga ry’ubwenge buhangani (Artificial Intelligence) buyifasha gutahura no gukurikirana intego nyinshi icyarimwe.
