Ikipe y’abagize inteko ishinga amategeko ya Uganda yaraye inyagiye iy’abagize iy’umuryango wa Afurika y’Iburasirazuba (EALA) ibitego 10-0, mu mikino ya EALA ikomeje kubera i Kigali.
Hari mu mukino w’umunsi wa gatandatu w’iyi mikino waraye ubereye kuri Kigali Pele Stadium i Nyamirambo.
Ibitego Depite Twaha Kagabo (yatsinze bibiri), Paul Nsubuga, Peter Ogwang (na we yatsinze bibiri), Godfrey Wakooli, Benson Obua, Karim Masaba na Geoffrey Lutaaya byari bihagije ngo Uganda ikure intsinzi ibyibushye kuri EALA.
Ni umukino wa gatatu wikurikiranya abadepite ba Uganda batsindaga, dore ko ku wa Mbere w’iki cyumweru bari banyagiye ab’u Rwanda ibitego 12-0.
Mu yindi mikino: Ikipe y’abagore ya Basketball ya Tanzania yatsinze Sudani y’Epfo amanota 67-20, mu gihe mu bagabo Kenya yatsinze Sudani y’Epfo 42-39 na ho u Burundi butsindwa na Kenya 26-24.
Muri Volleyball u Rwanda mu byiciro byombi rwatsinzwe na Kenya amaseti 3-0, Tanzania (mu bagabo) itsinda EALA amaseti 3-0 na ho Uganda (mu bagore) itsinda Tanzania amaseti 3-0.
