Tajiri namba moja duniani na kiongozi wa kampuni mbalimbali za teknolojia, Elon Musk, ametangaza kuanzishwa kwa chama kipya cha kisiasa nchini Marekani kiitwacho America Party, kwa lengo la kupinga utawala wa vyama viwili vya jadi unaotawala Marekani.
Jumamosi, aliandika kwenye mtandao wake wa kijamii X:
“Kuhusu jinsi nchi yetu inaharibiwa na ufisadi na matumizi mabaya, tuko kwenye mfumo wa chama kimoja, siyo demokrasia. Leo, Chama cha Amerika kimeanzishwa ili kukurejeshea uhuru wako.”
Musk tayari alitumia mamia ya mamilioni ya dola kuunga mkono Trump kwenye uchaguzi uliopita, na alikuwa kiongozi wa kile kilichoitwa Wizara ya Ufanisi wa Serikali (DOGE) chini ya utawala wa Trump—mpango uliolenga kupunguza matumizi yasiyo na msingi ya serikali kabla ya mivutano kuanikwa hadharani.
Wiki hii, Musk alifufua wazo la kuanzisha chama kipya cha kisiasa wakati wabunge wa Marekani walipoidhinisha muswada wa kodi na matumizi ya serikali uliopendekezwa na Trump.
Musk aliukosoa muswada huo vikali na akajitolea kuanzisha chama kipya kupinga Warepublican waliounga mkono muswada huo.
Ijumaa, aliweka kura ya maoni kwenye X, akiuliza kama watumiaji wako tayari “kuachana na mfumo wa vyama viwili (au baadhi husema ni chama kimoja tu)”. Majibu zaidi ya milioni 1.2 yalipokelewa, ambapo zaidi ya 60% waliunga mkono chama kipya.
