Nyuma y’iminsi ibiri Ethiopia igennye ambasaderi wayo muri Eritrea, perezida w’iki gihugu, Isaias Afwerki nawe yashyizeho ambasaderi wa mbere wa Eritrea muri Ethiopia nk’uko itangazo rya guverinoma ryashyizwe ahagaragara kuri uyu wa Gatandatu rivuga.
Ambasaderi wa Eritrea muri Ethiopia akaba ari Semere Russom, wari minisitiri w’uburezi ndetse akaba yarabaye ambasaderi wa Eritrea muri Leat Zunze Ubumwe za Amerika nk’uko byatangajwe na minisitiri w’itangazamakuru, Yemane Meskel abinyujije kuri twitter.
Kuwa Kane ushize, nibwo Ethiopia yari yagennye Redwan Hussein, wahoze ari ambasaderi muri Ireland ngo ayihagararire muri Eritrea nk’uko Africanews dukesha iyi nkuru ivuga.
Ibi bikaba bije bikurikira amasezerano yo guhagarika intambara yashyizweho umukono hagati y’ibihugu byombi nyuma y’aho Minisitiri w’Intebe mushya wa Ethiopia, Abiy Ahmed agiriye ku butegetsi.
Abayobozi b’ibihugu byombi barasuranye, maze muri iki cyumweru, ambasade z’ibihugu byombi zirafungurwa.
Kompanyi y’indege ya Ethiopian Airlines kuwa gatatu yakoze urugendo rwa mbere I Asmara, mu murwa mukuru wa Eritrea, ku nshuro ya mbere kuva mu myaka isaga 20 ishize, aho iyi ndege yakirijwe imbyino z’ababyinnyi bari bafite amabendera ya Ethiopia, ari nako imiryango yatandukanyijwe n’intambara yongeye guhura.
Igihugu cya Eritrea kikaba cyarahoze ari intara ya Ethiopia mbere yo kwigenga mu 1991 bikaza gukurikirwa n’intambara hagati y’ibihugu byombi yatangiye mu 1998 kugeza mu 2000 ariko ibihugu byombi bikomeza kubaho birebana ay’ingwe nk’ibiri mu ntambara.
Nsengiyumva Denis/ Bwiza.com
