Imyaka itatu ishize Lt. Gen Adolphe Nshimirimana wari inkingi ikomeye mu gisirikare cy’u Burundi yishwe, bitewe n’uruhare yagize ngo Leta ya Nkurunziza ifate ubutegetsi, bamwe bakaba bamusabira gushyirwa mu ntwari z’igihugu ariko abandi bakabitera utwatsi.
Ku wa 2 Kanama 2015, nibwo igikuba cyacitse i Burundi nyuma y’inkuru yari imaze kumenyekana ko Lt Gen Nshimirimana yishwe, urupfu rwateye agahinda cyane Leta iriho, kugera n’aho umukuru w’igihugu, Pierre Nkurunziza yitangarije ko imuciye umugongo.
Perezida Nkurunziza yahise atanga iminsi irindwi y’iperereza ngo hamenyekane ukuri ku rupfu rw’uyu musirikare benshi bari bazi ku kazina ka ‘Jenerali’.
Ibinyamakuru bitandukanye byagiye bitangaza ko gupfa kwa Adolphe ari nko gucika k’ukuboko kw’iburyo kwa Perezida Nkurunziza, kuko uretse no kuba yari inshuti ye ya hafi, ngo ni na we wari ushinzwe umutekano w’ubuzima bwe bwite.
Inyeshyamba za CNDD FDD zifata igihugu, Lt Gen Nshimirimana ashyirwa mu majwi kuba ku isonga mu babigizemo uruhare rukomeye, ku buryo yari umwe mu bavugaga rikijyana muri Leta iriho.
Kuri uyu wa Kane tariki ya 2 Kanama 2018, nyuma y’imyaka 3 ishize yishwe, abantu benshi babicishije ku mbuga nkoranyambaga, baribuka urupfu rw’uyu mujenerali benshi byagoye kwiyumvisha ko ari we wishwe, bitewe n’ubuhangange bari bamuziho mu gihugu.
Mu gihe hari abamwita intwari y’igihugu bitewe n’ibigwi bye byafashije CNDD FDD gufata ubutegetsi no guhangana n’abatavuga rumwe na Leta, kugera n’aho agize uruhare mu guhagarika Coup d’Etat yo ku wa 13 Gicurasi 2015, ku rundi ruhande ashinjwa ibyaha birimo ubwicanyi, ari naho bamwe bahera bavuga ko atakwitwa intwari mu Burundi.
Umwaka ushize, nibwo umuyobozi w’ishyaka FNL, Jacques Bigirimana, yasabye Perezida Nkurunziza gushyira Adolphe Nshimirimana mu Ntwari z’igihugu, ariko ibi bamwe mu banyapolitiki ntibabikozwa bavuga ko iki cyemezo gishyizwe mu bikorwa kwaba ari nko gutesha agaciro abo ashinjwa kwica.
Jérémie Minani, umuyobozo w’impuzamashyaka (CNARED) atavuga rumwe na Leta y’u Burundi, yamaganiye kure ubu busabe bwa FNL ndetse ko kwaba ari ugusebya Leta y’u Burundi ndetse no gutuka abo yaba yarishe yashinjwaga
Ati: “Gusaba ko yashyirwa mu ntwari z’igihugu ni nk’igitutsi ku gihugu cy’u Burundi ahubwo turasaba ko hakorwa iperereza ry’icyatumye haba ubwo bwicanyi”.
Yakomeje avuga ko hari abantu benshi bagiye bicwa bagashyirwa ku mutwe w’uyu mujenerali, gusa ku ruhande rwa Jacques Bigirimana avuga ko kuba intwari bidasobanuye ko uba wishimiwe na bose.
Ati “Kuvuga ko yari umwicanyi, na Ndadaye yashinjwaga kuyobora jenoside, ntabwo ushobora kwicwa ntacyo ushinjwa, kuba wakwitwa intwari ntabwo bivuze kuba wemerwa na bose, birahagije kuba uzwiho ibikorwa na benshi”.
Ikinyamakuru RPA gitangaza ko muri Raporo yashyizwe hanze na Loni mu 2008, Adolphe aza ku mutwe w’umugambi SAFISHA, wo gutsemba inzirakarengane za FNL ya Agathon Rwasa n’aba MSD hagati ya 2011 na 2012, ubu bwicanyi bwahitanye abasaba 800.
Lt Gen Adolphe Nshimiyimana kandi anashinjwa kwica ababikira 3 b’Abataliyani babaga mu Kamenge mu 2014.
ikindi kandi agashinjwa kuba yarakoranaga akanatera inkunga inyeshyamba za FDLR zigizwe na bamwe basize bakoze jenoside yakorewe Abatutsi mu Rwanda mu mwaka wa 1994.
Kuba Perezida Nkurunziza asabwa gushyira Gen Adolphe Nshimirimana mu Ntwari z’igihugu, ntacyo yari yabitangazaho n’ubwo yari inshuti ye y’akataraboneka.
