Ikipe ya Real Madrid yaraye ifashe umwanya wa mbere ku rutonde rwa Shampiyona ya Espagne, nyuma yo kujya gutsinda bigoranye cyane ikipe ya Real Sociedad ibitego 2-1.
Hari mu mukino w’umunsi wa 30 wa La Liga iyi kipe yasabwaga gutsinda, nyuma y’uko ku wa gatandatu w’icyumweru gishize FC Barcelona yari iya mbere yananiwe gutsinda Sevilla bakanganya 0-0.
Ibitego bya Sergio Ramos kuri penaliti na Karim Benzema byari bihagije kugira ngo Real Madrid ibone amanota atatu yayihesheje umwanya wa mbere by’agateganyo.
Real Sociedad yihariye cyane iminota ya nyuma y’umukino, yabonye impozamarira ku munota wa 83 w’umukino ku gitego yatsindiwe na Mikel Merino.
Uyu mukino wagaragayemo ukutishimira imisifurire ku ruhande rwa Real Sociedad, kuko nko ku munota wa 68 Adnan Januzaj wari winjiye mu kibuga asimbura, yatsindiye Sociedad igitego cyo kwishyura ari hanze y’urubuga rw’amahina, gusa abasifuzi bakemeza ko Merino utari wigeze akora ku mupira yaraririye.
Ibintu byaje guhumira ku mirari ubwo Karim Benzema yatsindiraga Real Madrid igitego cya kabiri ku munota wa 80, ku mupira yari ahinduriwe n’Umunya-Uruguay, Federico Valverde (Benzema) akawufungisha urutugu mbere yo kuwutereka mu rucundura. Ni igitego cyemejwe mbere yo kwiyambaza VAR.
Magingo aya Real Madrid y’umutoza Zinedine Zidane inganya na FC Barcelona amanota 65, bagatandukanwa n’uko Real Madrid yitwaye neza mu mikino ibiri yayihuje na mukeba wayo, aho ubanza wabereye i Camp Nou warangiye amakipe yombi anganya 0-0, uwo kwishyura wabereye i Santiago Bernabeu Real Madrid ikawutsindamo FC Barcelona ibitego 2-0.
