Leta ya Ethiopia yategetse abanyamakuru n’abakoresha imbuga nkoranyambaga kudatangaza uko intambara iri hagati y’ingabo z’igihugu n’imitwe yitwaje intwaro irwanya ubutegetsi iri kugenda.
Amakuru babujijwe gutangaza ni aba atatangajwe na Guverinoma ya Ethiopia, uwabirengaho akazahanwa n’inzego zishinzwe umutekano nk’uko aya mabwiriza yasohotse ku wa Kane w’icyumweru gishize abivuga.
Iri tangazo rigira riti: “Birabujijwe gusakaza mu muyoboro uwo ari wo wose w’itumanaho ingendo z’igisirikare n’amakuru ava ku rugamba. Inzego zishinzwe umutekano zizafatira ibyemezo bikwiye uzabirengaho.”
Leta ishyizeho amabwiriza hari hashize igihe kirekire muri iki gihugu hari abatambutsa amakuru atandukanye, yemeza ko harimo ayobya n’icengezamatwara. Muri yo harimo avuga ko iyi mitwe yitwaje intwaro iri hafi gufata umurwa mukuru, Addis Ababa.
Ni nyuma kandi y’igihe gikabakaba ukwezi Minisitiri w’Intebe, Abiy Ahmed uyoboye ingabo za Leta ziri ku rugamba, ashyiriyeho iki gihugu ibihe bidasanzwe, byatangiye gushakishirizamo ababa bakorana n’iyi mitwe yitwaje intwaro, bagatabwa muri yombi.
Intambara iri muri Ethiopia yatangiye mu Gushyingo 2020. Nyuma y’aho iyi mitwe ifashe uduce tumwe na tumwe mu ntara ya Amhara na Afar, Leta itangaza ko hari utwo yamaze kwigarurira turimo umujyi wa Chifra.
